အယ်လ်နာဆာအသင်းနည်းပြ ရူဒီဂါစီယာက နာမည်ကျော်တိုက်စစ်မှူး စီရော်နယ်လ်ဒိုအနေဖြင့် အသင်း ပွဲဦးထွက်ပွဲစဉ်တွင် ရုန်းကန်ခဲ့ရသော်လည်း ၎င်းနှင့်ကိုက်ညီစေရန်အတွက် အသင်း၏ကစားပုံကို ပြောင်းလဲမည်မဟုတ်ကြောင်း ပြောကြားခဲ့သည်။
စီရော်နယ်လ်ဒိုသည် အယ်လ်နာဆာကစားသမားဘ၀ ပထမဆုံးတရားဝင်ပွဲဦးထွက်ပွဲစဉ်အဖြစ် ဇန်နဝါရီ(၂၃) ရက်က ကစားခဲ့သည့် ဆော်ဒီလိဂ်ပွဲစဉ် အယ်လ်နာဆာ (၁-ဝ) Al Ittifag ပွဲတွင် ပါဝင်ကစားခဲ့သည်။
အဆိုပါပွဲစဉ်တွင် အယ်လ်နာဆာအသင်း အနိုင်ရရှိခဲ့သော်လည်း ကမ္ဘာ့စံချိန်တင်လစာရရှိနေသည့် နာမည်ကျော်ပေါ်တူဂီတိုက်စစ်မှူး စီရော် နယ်လ်ဒိုသည် ခြေစွမ်းပြနိုင်ရန် ရုန်းကန်ခဲ့ရခြင်းကြောင့် လူမှုကွန်ရက်တွင် ပရိသတ်များ၏ဝေဖန်မှုများနှင့် ရင်ဆိုင်ခဲ့ရသည်။
အသက် (၃၇)နှစ်အရွယ် စီရော်နယ်လ်ဒိုအနေဖြင့် အယ်လ်နာဆာအသင်း၏ ပွဲဦးထွက် ပွဲစဉ်တွင် ရုန်းကန်ခဲ့ရသော်လည်း အသင်းနည်းပြ ရူဒီဂါစီယာကမူ မိမိအနေဖြင့် အသင်း၏ကစားဟန်ကို စီရော်နယ်လ်ဒိုနှင့်ကိုက်ညီအောင် ပြောင်းလဲသွားမည်မဟုတ်ကြောင်း ပြောကြားခဲ့ခြင်းဖြစ်သည်။
ရူဒီဂါစီယာက “ကစားသမားတွေအနေနဲ့ ဘောလုံးရတိုင်း စီရော်နယ်လ်ဒိုကို ပေးဖို့ မကြိုးစားဘဲ ပုံမှန်အတိုင်းကစားဖို့ အရေးကြီးပါတယ်။ စီရော်နယ်လ်ဒိုအတွက် ကစားပုံကို ပြောင်းလဲမှာ မဟုတ်ပါဘူး။ သူဟာ Ballon d’Or ဆုကို (၅) ကြိမ်ရထား သူဖြစ်ပြီး ဘောလုံးသမိုင်းမှာ ထာဝရအကောင်းဆုံးတွေထဲက တစ်ဦးဖြစ်ပါတယ်။ ကျွန်တော့်အနေနဲ့ စီရော်နယ်လ်ဒိုကို ဘောလုံးကို ပျော်ရွှင်စွာ ကစားစေချင်ပါတယ်။ သူ အကောင်းဆုံးပုံစံမှာရှိနေဖို့ပဲ အရေးကြီးတာပါ” ဟု ပြောကြားခဲ့သည်။
