ဥရောပဘောလုံးအဖွဲ့ချုပ် (UEFA) ဥက္ကဋ္ဌ ဆယ်ဖာရင်က တစ်ခါတစ်ရံတွင် အမှန်တရားပေါ် ပေါက်ရန် နှေးကွေးတတ်သော်လည်း အမြဲထွက်ပေါ်လေ့ရှိကြောင်း ရီး ယဲလ်မက်ဒရစ်၊ ဘာစီလိုနာနှင့် ဂျူ ဗင်တပ်စ်အသင်းတို့ကို သတိပေး ပြောကြားခဲ့သည်။
UEFA စည်းကမ်းထိန်းသိမ်းရေးကော်မတီသည် ဥရောပစူပါလိဂ် မှ နုတ်ထွက်ရန် ကျန်ရှိနေသည့် ရီးယဲလ်မက်ဒရစ်၊ ဘာစီလိုနာနှင့် ဂျူ ဗင်တပ်စ်အသင်းတို့ကို အရေးယူရန် စုံစမ်းစစ်ဆေးမှုများ ပြုလုပ်နေသော်လည်း မက်ဒရစ်မြို့ရှိ တရားရုံးတစ်ခုက အငြင်းပွားမှုများ ပြေလည်မှုမရမချင်း ၎င်းတို့သုံးသင်းအား UEFA နှင့် FIFA (ကမ္ဘာ့ဘောလုံးအဖွဲ့ချုပ်) က အရေးယူခြင်းမပြုရဟု ထုတ်ပြန်ခဲ့သောကြောင့် စစ်ဆေးမှုများအား ရပ်ဆိုင်းထားကြောင်း ထုတ်ပြန်ကြေညာခဲ့သည်။ သို့ ဖြစ်ရာ ရီးယဲလ်မက်ဒရစ်၊ ဘာစီလို နာနှင့် ဂျူဗင်တပ်စ်အသင်းတို့အနေ ဖြင့် ချက်ချင်းအရေးယူခံရတော့မည် မဟုတ်ဘဲ လာမည့် ၂၀၂၁-၂၀၂၂ ရာသီ ချန်ပီယံလိဂ်ပြိုင်ပွဲတွင် ယှဉ်ပြိုင်ခွင့်ရရှိရန် သေချာသွားပြီဖြစ်သည်။
သို့ဖြစ်ရာ UEFA ဥက္ကဋ္ဌ ဆယ် ဖာရင်က အီတလီအခြေစိုက် RAI Sport ရုပ်သံနှင့် တွေ့ဆုံစဉ် “ကျွန်တော့်အနေနဲ့ ပြောနိုင်တာကတော့ အမှန်တရားဆိုတာ တစ်ခါတစ်ရံမှာ နှေးကွေးတတ်ပေမဲ့ အမြဲတမ်းထွက်ပေါ်လာစမြဲဆိုတာ ပါပဲ။ စည်းကမ်းပိုင်းဆိုင်ရာကိစ္စတွေမှာ ကျွန်တော်ဝင်မပါပါဘူး။ ဒါပေမဲ့ ဘယ်လိုပုံစံနဲ့သွားနေလဲဆိုတာ ကျွန်တော်တွေ့နေရပါတယ်။ ဒါက ပြီးပြတ်သွားမယ့်ကိစ္စ မဟုတ်ပါဘူး။ ပထမဆုံးအနေနဲ့ ဥပဒေကိစ္စတွေကို ရှင်းလင်းပြီးသွားရင် ကျွန်တော်တို့ ရှေ့ဆက်သွားမှာပါ။ တစ်ခါတလေကျရင် ဒီကလပ်သုံးသင်းက အချိန် ကာလတစ်ခုလောက် ကျောင်းမတက်တဲ့ ကလေးတွေလိုပဲလို့ ခံစားရတယ်။ သူတို့က မွေးနေ့ပါတီကို အဖိတ်မခံရပေမဲ့ လာခွင့်ရဖို့ ရဲကိုအကူအညီ သွားတောင်းသလိုပါပဲ” ဟု သတိပေးကြားခဲ့သည်။
ထို့ပြင် AFP သတင်းဌာနနှင့် ဆက်လက်ပြုလုပ်သည့် အင်တာဗျူး အစီအစဉ်တွင်လည်း ဆယ်ဖာရင်က “ဒီစုံစမ်းစစ်ဆေးရေးကိစ္စက ပြန်စမယ်ဆိုတာ သေချာပါတယ်။ ဒီမှာ လွတ်လပ်တဲ့ စည်းကမ်းထိန်းသိမ်း ရေးကော်မတီရှိပြီး ရှေ့နေတွေကလည်း ကျွန်တော့်ကို အကြံဥဏ်ပေး ကြပါတယ်။ ဒီကိစ္စကို ရှေ့နေတွေက ပြီးဆုံးအောင်လုပ်ဖို့ ကျွန်တော်တို့ စောင့်ရမှာပါ။ ကျွန်တော့်အမြင်ပြောရရင်တော့ အရေးကြီးဆုံးအချက်က ဒီကလပ်သုံးသင်းဟာ အချိန်တော် တော်ကြာကတည်းက အားကစားဆိုင်ရာ ယှဉ်ပြိုင်မှုနဲ့ ကိုယ်ကျင့်တရား ပျက်စီးနေပြီးသားပါ။ အခုအချိန်ကစပြီး ဥပဒေကြောင်းအရ ယှဉ်ပြိုင်မှု တွေ စတင်ပါပြီ။ တရားရုံးကိစ္စကို အရင်ဆုံး ဖြေရှင်းပြီးသွားရင် စည်းကမ်းပိုင်းကိစ္စကိုပြန်စဖို့ ဥပဒေအဖွဲ့ က အကြံပေးထားပါတယ်” ဟု ပြောကြားထားသည်။
ကလပ်အသင်း ၂၀ ဖြင့် ကျင်းပ မည့် ဥရောပစူပါလိဂ်အစီအစဉ်ကို ထိပ်သီးကလပ် ၁၂ သင်းက ဧပြီလအတွင်း ထုတ်ပြန်ခဲ့ခြင်းဖြစ်ပြီး ပရိသတ်များအပါအဝင် နယ်ပယ်အသီး သီးမှ ပြင်းထန်သည့် ဝေဖန်ကန့်ကွက်မှုများကြောင့် မန်ယူ၊ မန်စီးတီး၊ လီ ဗာပူးလ်၊ ချယ်လ်ဆီး၊ အာဆင်နယ်၊ စပါးစသည့် ပရီးမီးယားလိဂ် Big Six ခြောက်သင်း၊ အက်သလက်တီ ကို၊ အေစီမီလန်နှင့် အင်တာမီလန် အသင်းတို့က ပြန်လည်နုတ်ထွက်ခဲ့သော်လည်း ရီးယဲလ်မက်ဒရစ်၊ ဘာစီလိုနာ၊ ဂျူဗင်တပ်စ်တို့သုံးသင်း ကျန်ရှိနေခြင်းဖြစ်သည်။
UEFA သည် စူပါလိဂ်မှနုတ်ထွက်ကြောင်း ကြေညာထားသည့် ကိုးသင်းအား ဒဏ်ကြေးအနည်းငယ်သာ ချမှတ်ရန် သဘောတူညီမှုရထားပြီး ကျန်ရှိသည့်သုံးသင်းကိုမူ အရေးယူရန် စုံစမ်းစစ်ဆေးမှုများ ပြုလုပ်လျက်ရှိသည်။ မီဒီယာများ၏ဖော်ပြမှုအရ ၎င်းတို့သုံးသင်းအနေဖြင့် ဥရောပ ပြိုင်ပွဲယှဉ်ပြိုင်ခွင့် နှစ်နှစ်ပိတ်ပင်ခံရ ဖွယ်ရှိကြောင်း သိရသည်။
