မန်ယူအသင်းသည် အသင်း၏အမြဲတမ်းနည်းပြအဖြစ် ခန့်အပ်ရန်အတွက် PSG နည်းပြ ပိုချက်တီနိုကို လျှို့ဝှက်စွာဖြင့် ဆက်သွယ်နေကြောင်း ပြင်သစ်သတင်းစာ Le Parisien က ဖော်ပြခဲ့သည်။
အသက် (၄၉)နှစ်အရွယ်ရှိ အာဂျင်တီးနားလူမျိုးနည်းပြ ပိုချက်တီနိုသည် PSG အသင်းနှင့် ၂၀၂၃ ခုနှစ်အထိ စာချုပ်သက်တမ်းရှိနေသူဖြစ်သည်။
သို့သော် ပိုချက်တီနိုသည် ယခုရာသီကုန်အထိသာ ကိုင်တွယ်မည့် မန်ယူနည်းပြ ရန်းနစ်၏ နေရာတွင် အမြဲတမ်းနည်းပြအဖြစ် ခန့်အပ်ခံရမည့်သူအဖြစ် ထိပ်ဆုံးမှ ရေပန်းစားလျက်ရှိနေသည်။
Le Parisien ၏ ဖော်ပြချက်အရ မန်ယူအသင်းသည် အသင်းနည်းပြ ဆိုးလ်ရှားကို ရာထူးမှထုတ်ပယ်ခဲ့သည့် ၂၀၂၁ နိုဝင်ဘာမှ စတင်ကာ ပိုချက်တီနိုကို စိတ်ဝင်စားကြောင်း ပြသခဲ့ပြီး ယင်းကတည်းက မန်ယူအသင်းနှင့် ပိုချက်တီနိုတို့အကြား အဆက် အသွယ်ရှိခဲ့ကြောင်း သိရသည်။
ထို့ပြင် မန်ယူအသင်းတွင် ပိုချက်တီနိုကို နှစ်သက်သူများစွာရှိနေကြောင်းလည်း Le Parisien က ဖော်ပြခဲ့သည်။
မန်ယူအသင်းသည် ယခုရာသီကုန်အထိသာ ကိုင်တွယ်မည့် ယာယီနည်းပြ ရန်းနစ်၏နေရာတွင် အမြဲတမ်းနည်းပြအဖြစ်ခန့်အပ်ရန် PSG နည်းပြ ပိုချက်တီနို၊ အေဂျက်စ်နည်းပြ တန်ဟက်ဂ်နှင့် လက်စတာနည်းပြ ဘရန်ဒန်ရော်ဂျာတို့ကို ပစ်မှတ်ထားနေကြောင်း ဗြိတိန်မီဒီယာများက ဖော်ပြခဲ့ကြသည်။
သို့သော် Le Parisien ကမူ မန်ယူကစားသမားများ၏ ထောက်ခံအားပေးမှုကို ရရှိထားသည့် ပိုချက်တီနိုနှင့် တန်ဟက်ဂ်တို့သာ မန်ယူအသင်း၏ အမြဲတမ်းနည်းပြရာထူးအတွက် အဓိကယှဉ်ပြိုင်ရမည်ဖြစ်ကြောင်း ဖော်ပြခဲ့သည်။
မန်ယူအသင်းကို ယခုရာသီကုန်အထိ ကိုင်တွယ်ပြီး အကြံပေးအဖြစ် ဆောင်ရွက်ဖွယ်ရှိနေသည့် ရန်းနစ်ကမူ ပိုချက်တီနိုထက် တန်ဟက်ဂ်ကိုသာ အမြဲတမ်းနည်းပြအဖြစ် ခန့်အပ်ရန် အလိုရှိနေကြောင်း သိရသည်။
သို့သော် မန်ယူကစားသမားများကမူ ပရီးမီးယားလိဂ်ကလပ်များဖြစ်သည့် ဆောက်သမ်တန်နှင့် စပါးတို့တွင် အကောင်းဆုံးစွမ်းဆောင်ပြခဲ့သည့် ပိုချက်တီနိုကိုသာ ပိုနှစ်သက်နေကြသည်။
ပိုချက်တီနိုသည် PSG အသင်းကို ကိုင်တွယ်နေသော်လည်း ပါရီတွင် အခြေမကျသေးဘဲ ၎င်း၏မိသားစုမှာ လန်ဒန်တွင် နေထိုင်နေဆဲဖြစ်ကြောင်း သိရသည်။
ထို့ပြင် ပိုချက်တီနို ကိုယ်တိုင်ကလည်း မန်ယူအသင်းကို ကိုင်တွယ်ရန်ဆန္ဒရှိနေကြောင်း Le Parisien က ဖော်ပြခဲ့သည်။
