ဒေါ့မွန်အသင်း၏ တိုက်စစ်မှူး ဟော်လန်းက မိမိအနေဖြင့် အနာဂတ်အတွက် ဆုံးဖြတ်ရခြင်းမရှိသေးဟု ပြောကြားခဲ့သည်။
နော်ဝေတိုက်စစ်မှူး ဟော်လန်း(၂၀ နှစ်)သည် ဥရောပထိပ်သီးအသင်းများစွာ၏ ပစ်မှတ်ကစားသမား တစ်ဦးဖြစ်နေပြီး မန်ယူ၊ မန်စီးတီး၊ ချယ်လ်ဆီးနှင့် ဘာစီလိုနာအသင်းတို့က ယခုနွေရာသီအပြောင်းအ ရွှေ့ကာလတွင် အပြိုင်အဆိုင်ကမ်းလှမ်းကြဖွယ်ရှိ နေကြောင်းလည်း သတင်းများထွက်ပေါ်နေသည်။
ထို့ကြောင့် မီဒီယာသမားများက ၎င်း၏ အနာဂတ်အစီအစဉ်နှင့် ပတ်သက်၍ မေးမြန်းခဲ့ရာ ဟော်လန်းက “ကျွန်တော် ဘာမှ မဆုံးဖြတ်ရသေးပါဘူး။ လက်ရွေးစင်အသင်းရဲ့ ပွဲစဉ်တွေ ပြီးသွားရင် အားလပ်ရက် အပန်းဖြေခရီးထွက်မှာပါ။ ပြီးရင် ကလပ်အသင်းရဲ့ ရာသီကြိုလေ့ကျင့်မှုအတွက် သတင်းပို့မှာပါ” ဟု ပြောကြားခဲ့သည်။
ဟော်လန်းသည် လက်ရှိအချိန်တွင် နော်ဝေလက်ရွေးစင်အသင်းနှင့် ခြေစမ်းပွဲများ ယှဉ်ပြိုင်ကစားရန် ပူးပေါင်းလေ့ကျင့်နေပြီး ယူရိုပြိုင်ပွဲ ယှဉ်ပြိုင်ကစားရန် မရှိသည့်အတွက် ၎င်း၏ အားလပ်ရက်မှာ မကြာမီ ရောက်ရှိလာတော့မည်ဖြစ်သည်။ ထို့ကြောင့် ၎င်း၏ အပြောင်းအရွှေ့သတင်းကို ဇွန်လ အတွင်းတွင်ပင် ကြားသိရဖွယ်ရှိနေကြောင်း သုံးသပ်မှုများလည်း ရှိနေသည်။
ဟော်လန်းသည် ဒေါ့မွန်အသင်းနှင့် ၂၀၂၄ ခုနှစ်အထိ စာချုပ်ချုပ်ဆိုထားသူဖြစ်သော်လည်း အေးဂျင့်ဖြစ်သူက အပြောင်းအရွှေ့ဖြစ်မြောက်ရန် လိုလားနေသလို၊ ဒေါ့မွန်အသင်းကလည်း မြင့်မား သည့် ပြောင်းရွှေ့ကြေးရရှိပါက ရောင်းထုတ်ဖွယ်ရှိ နေကြောင်း သိရသည်။
ပြီးခဲ့သည့် မတ်လအတွင်းက ထွက်ပေါ်ခဲ့သည့် ခန့်မှန်းချက်များတွင် ဟော်လန်း ရောက်ရှိရန် ရီးယဲလ်အသင်းက ရေပန်းအစားဆုံး ဖြစ်ခဲ့သော်လည်း လက်ရှိအချိန်တွင်မူ မန်စီးတီးအသင်းက ရေပန်းအစားဆုံးဖြစ်နေပြီး လာလီဂါထက် ပရီးမီးယားလိဂ်သို့ ရောက်ရှိရန် ပိုမိုအလားအလာများနေကြောင်းလည်း ခန့်မှန်းနေကြသည်။
