အာဆင်နယ်အသင်း၏ နည်းပြဟောင်း အာစင်ဝင်းဂါးသည် အနာဂတ်ကာလ၌ ပြောင်းရွှေ့ကြေးအလွတ်ဖြင့် လမ်းခွဲသည့်ကစားသမားများ ပိုများလာနိုင်သည်ဟု လွန်ခဲ့သည့် (၄)နှစ်ကတည်းက ခန့်မှန်းခဲ့ကြောင်း သိရသည်။
အာစင်ဝင်းဂါးက ပြောင်းရွှေ့ ကြေးတန်ဖိုးများ အလွန်အမင်းမြင့်မားလာခြင်းကြောင့် ပေါက်စျေးအတိုင်း ဝယ်ယူလိုသည့်အသင်း ရှားပါးလာမည်ဖြစ်ပြီး စာချုပ်သက်တမ်းကုန်သည်အထိစောင့်ကာ အလွတ်ခေါ်ယူရန်သာ ကြိုးပမ်းကြလိမ့်မည်ဟု သုံးသပ်ခဲ့ခြင်းဖြစ်သည်။
အာစင်ဝင်းဂါးက ” ပြောင်းရွှေ့ကြေးအလွတ်နဲ့ ပြောင်းရွှေ့တာတွေကို အနာဂတ်မှာ ပိုပြီးမြင်တွေ့ရလိမ့်မယ်လို့ ကျွန်တော် ထင်ပါတယ်။ ဘာကြောင့်လဲဆိုတော့ သာမန်ကစားသမားတွေအတွက်တောင် ပြောင်းရွှေ့ကြေးတွေက အလွန်မြင့်မားလာတာကြောင့်ပါ။ ဒါကြောင့် စာချုပ်သက်တမ်းကုန်မှ ပြောင်းရွှေ့မယ့်ကစားသမားတွေ ပိုများလာပါလိမ့်မယ်။ ကလပ်အသင်းတွေက ပြောင်းရွှေ့ကြေးမပေးချင်ဘဲ ဖြစ်လာမှာကြောင့်ပါ။ နောက်(၁၀)နှစ်လောက်ဆို ဒါကပုံမှန်ဖြစ်သွားပါလိမ့်မယ်။ နှစ် (၂၀)လောက်ဆိုရင်တော့ ပြောင်းရွှေ့ကြေးဆိုတာ မရှိနိုင်တော့ပါဘူး”ဟု ခန့်မှန်းခဲ့ခြင်းဖြစ်သည်။
ယခုအခါ အာစင်ဝင်းဂါးခန့်မှန်းခဲ့သည့်အတိုင်း မက်ဆီ၊ ရာမို့စ်တို့ကဲ့သို့ ကစားသမားများ ပြောင်းရွှေ့ကြေးအလွတ်ဖြင့် လမ်းခွဲခဲ့ပြီဖြစ်သလို၊ ပေါ့ဘာ၊ ဘာပေ၊ ဂိုဟက်ဇ်ကာတို့လည်း ယင်းကဲ့သို့ ဖြစ်လာဖွယ်ရှိနေသည်။
