အငြင်းပွားဖွယ်ဆုံးဖြတ်ချက်များ ချမှတ်ခဲ့သည့် ဒိုင်လူကြီး မိုက်ဒင်း အသက်အန္တရာယ်ခြိမ်းခြောက်မှုနှင့် ရင်ဆိုင်နေရ

ပရီးမီးယားလိဂ်၏ ၀ါရင့်ဒိုင်လူကြီးတစ်ဦးဖြစ်သော မိုက်ဒင်းသည် အငြင်းပွားဖွယ်ဆုံးဖြတ်ချက်များ ဆက်တိုက်ချမှတ်ခဲ့ခြင်းကြောင့် လက်ရှိအချိန်တွင် အသက်အန္တရာယ် ခြိမ်းခြောက်မှုနှင့် ရင်ဆိုင်နေရ ကြောင်း သိရသည်။

မိုက်ဒင်း(၅၂ နှစ်)သည် ၂၀၀၀ ခုနှစ်ကတည်းက ပရီးမီးယားလိဂ်ဒိုင်လူကြီးအဖြစ် ဆောင်ရွက်ခဲ့သူဖြစ်ပြီး ဇနီးနှင့် သမီးနှစ်ဦး ရှိနေသည်။ မိုက်ဒင်းသည် ယခုရက်သတ္တပတ်အတွင်း ကစားသမားနှစ်ဦးကို အနီကတ်ပြ ထုတ်ပယ်ခဲ့ရာ၌ ဝေဖန်ပြစ်တင်မှုများနှင့် ရင်ဆိုင်ခဲ့ရပြီး ၎င်း၏မိသားစုကိုပါ အသက်အန္တရာယ်ခြိမ်းခြောက်မှုများ ရှိလာခြင်းဖြစ်ကြောင်း သိရသည်။

မိုက်ဒင်းသည် မန်ယူနှင့် ဆောက်သမ်တန်ပွဲ၌ ဆောက်သမ်တန်နောက်ခံလူ ဘတ်နာရတ်ခ်ကို အနီကတ်ပြခဲ့သလို၊ ဖူလ်ဟမ်နှင့် ဝက်စ်ဟမ်းပွဲတွင်လည်း ဝက်စ်ဟမ်းကွင်းလယ်လူ ရှူချက်ခ်ကို အနီကတ်ပြခဲ့သည်။ ယင်းဆုံးဖြတ် ချက်များအတွက် အငြင်းပွားမှုများရှိခဲ့သည့်အပြင် အဆိုပါကစားသမားနှစ်ဦးစလုံးက အယူခံတင်သွင်းခဲ့ရာ အောင်မြင်မှုရရှိပြီး အနီကတ်ပြစ်ဒဏ်များကို ပယ်ဖျက်ပေးခဲ့ရသည်။ ထို့ ကြောင့် မိုက်ဒင်းအပေါ် ဝေဖန်ပြစ်တင်မှုများ ပိုမိုမြင့်တက်လာရုံသာမက အ သက်အန္တရာယ်ခြိမ်းခြောက်မှုများ၊ ပုဂိုလ်ရေးစော်ကားတိုက်ခိုက်မှုများလည်း ရှိလာခဲ့ကြောင်း သိရသည်။

ထို့ကြောင့် မိုက်ဒင်းက မာဆေးဆိုက်ဒ်ရဲတပ်ဖွဲ့ထံ တိုင်ကြားမှု ပြုလုပ်ခဲ့သလို၊ လာမည့်ပရီးမီးယားလိဂ်ပွဲစဉ်၌ တာဝန်ပေးအပ်ခြင်းမပြုရန် တောင်းဆိုထားကြောင်းလည်း သိရသည်။ ပရော်ဖက်ရှင်နယ်ဒိုင်လူကြီးများအဖွဲ့၏ မန်နေးဂျင်းဒါရိုက်တာ မိုက်ခ်ရီလေးကမူ အသက်အန္တရာယ်ခြိမ်းခြောက်မှုနှင့် စော်ကား ပြောဆိုမှုများကို လက်မခံနိုင်ခြင်းမရှိ၍ မိုက်ဒင်းဘက်မှ ရပ်တည်သွားမည်ဟု ဆိုခဲ့သည်။