အာဆင်နယ်နှင့် မန်ယူအသင်းတို့၏ တိုက်စစ်မှူးဟောင်း အလက်ဆစ်ဆန်းချက်ဇ်သည် အင်တာမီလန်အသင်းနှင့် စာချုပ်ဖျက်သိမ်းရန် သဘောတူညီမှုရရှိခဲ့ကြောင်း သိရသည်။
ချီလီလက်ရွေးစင်တိုက်စစ်ကစားသမား အလက်ဆစ်ဆန်းချက်ဇ်(၃၃ နှစ်)သည် အင်တာမီလန်အသင်းနှင့် ၂၀၂၃ ခုနှစ်အထိ စာချုပ်ချုပ်ဆိုထားသော်လည်း ယခုအခါ လက်ကျန် စာချုပ်သက်တမ်းကို ဖျက်သိမ်းရန် သဘောတူညီမှု ရရှိခဲ့ခြင်းဖြစ်သည်။
အင်တာမီလန်အသင်းသည် အလက်ဆစ်ဆန်းချက်ဇ်၏ လစာနှုန်းထားမြင့်မားမှုကြောင့် စာချုပ်ဖျက်သိမ်းပေးခဲ့ခြင်းဖြစ်ပြီး အသင်းလက်မဲ့ဖြစ်သွားပြီဖြစ်သည့် ၎င်းကို မာဆေးလ်အသင်းက ခေါ်ယူနိုင်ရန် အလားအလာကောင်းနေကြောင်း သိရသည်။
