ဒေါ့မွန်အသင်းတိုက်စစ်မှူး ဟော်လန်း၏ အေးဂျင့်ဖြစ်သူ ရိုင်အိုလာက ဘာစီလိုနာအသင်းဥက္ကဋ္ဌလောင်း ရူဆော့နှင့် အပြောင်း အရွှေ့အတွက် သဘောတူညီမှုရထားသည့် သတင်းများမှာ မှန်ကန်မှုမရှိကြောင်း ငြင်းဆန်ခဲ့သည်။
နော်ဝေလက်ရွေးစင် လူငယ်တိုက်စစ်မှူး ဟော်လန်းကို ဘာစီလိုနာအသင်းအပြင် လီဗာပူးလ်၊ မန်စီးတီး၊ မန်ယူ၊ ရီးယဲလ်မက်ဒရစ်စသည့် ဥရောပထိပ်တန်းကလပ်များစွာက စိတ်ဝင်စားနေပြီး ဝါရင့်အေးဂျင့်တစ်ဦးဖြစ်သူ မင်ဂယ်လာက ရွေးကောက်ပွဲအနိုင်ရလျှင် ဟော်လန်းကိုခေါ်ယူရန် ရူဆော့အား အကြံပေးထားကြောင်း ထုတ်ဖော်ပြောကြားခဲ့ပြီးနောက် အပြောင်းအရွှေ့သတင်းများ ထွက်ပေါ်လာခြင်းဖြစ်သည်။
သို့သော် Sport1 ရုပ်သံနှင့်တွေ့ဆုံစဉ် ရိုင်အိုလာက ယင်းသတင်းများကို ငြင်းဆန်ပယ်ချခဲ့ခြင်းဖြစ်ပြီး သတင်းအမှားသာဖြစ်ကြောင်း ပြောကြားခဲ့သည်။
“အဲဒါတွေက သတင်းအမှားတွေပါ။ ကျွန်တော်က ဟော်လန်းအတွက် ဒါမှမဟုတ် ကျွန်တော်နဲ့လက်တွဲထားတဲ့ ဘယ်ကစားသမားအတွက်မှ ဘာစီလိုနာဥက္ကဋ္ဌလောင်း တစ်ယောက်ယောက်နဲ့ ဆွေးနွေးတာမျိုးမလုပ်ဖူးပါဘူး။ ကျွန်တော်က အဲဒီလိုလုပ်မယ့်သူ မဟုတ်ပါဘူး။ ဇန်နဝါရီမှာ ဘာစီလိုနာဥက္ကဋ္ဌသစ်တစ်ယောက် ဖြစ်လာပြီဆိုရင်တော့ ကျွန်တော့်ဆီကို သူဖုန်းခေါ်လို့ရပါတယ်”ဟု ရိုင်အိုလာက ဆိုသည်။
ဟော်လန်းသည် လက်ရှိအချိန်တွင် တံကောက်ကြောဒဏ်ရာကြောင့် အနားယူနေရပြီး တနင်္ဂနွေနေ့ကစားမည့် ဝုလ်ဖ်ဘတ်အသင်းနှင့်ပွဲကိုလည်း ဆက်လက်လွဲချော်ဖွယ်ရှိနေသည်။
ဟော်လန်းသည် အဆိုပါဒဏ်ရာကြောင့် နိုဝင်ဘာလကုန်ပိုင်းကတည်းက အနားယူနေရခြင်းဖြစ်ပြီး လာမည့် ဇန်နဝါရီဒုတိယပတ်အတွင်း ပြန်လည်ကစားနိုင်ရန် မျှော်မှန်းနေကြောင်း သိရသည်။
