အာဆင်နယ်အသင်းနည်းပြဟောင်းဖြစ်သူ အာစင်ဝင်းဂါးက လီဗာပူးလ်အသင်းနှင့်ပွဲတွင် ခြေချင်းဝတ် နှစ်ဖက်စလုံး၌ ဒဏ်ရာရခဲ့သည့် ဟာရီကိန်းကို အလျင်အမြန် ပြန်လည်ကစားခိုင်းနေသည့် မော်ရင်ဟို၏ ဆုံးဖြတ်ချက်ကို ထောက်ခံခြင်းမရှိကြောင်း သိရှိရသည်။
အာစင်ဝင်းဂါးက ဟာရီကိန်း၏ အခြေအနေမှာ ကွင်းအတွင်း အလျင်အမြန် ပြန်လာသင့်သည့် အခြေအနေမျိုးမဟုတ်ဘဲ ယင်းပုံစံမျိုးဖြင့် ပရီးမီးယားလိဂ်၏ ခက်ခဲပြင်းထန်သည့် အခြေအနေအောက်တွင် ပြန်မကစားသင့်သေးကြောင်း ပြောကြားခဲ့ခြင်းဖြစ်သည်။
ဟာရီကိန်းသည် ဇန်နဝါရီလ (၂၈) ရက်နေ့ကမှ ဒဏ်ရာရခဲ့ခြင်းဖြစ်ပြီး အနည်းဆုံး (၁)လခန့် အနားယူရမည်ဟု ယူဆခဲ့ကြသော်လည်း ဖေဖော်ဝါရီ (၇)ရက်နေ့တွင် ကစားခဲ့သည့် ဝက်စ်ဘရွန်းနှင့်ပွဲ၊ ယင်းပွဲအပြီး (၄) ရက်အကြာတွင်ကစားခဲ့သည့် အဲဗာ တန်နှင့်ပွဲအပြင်၊ မန်စီးတီးနှင့်ပွဲတို့ကို ပါ ဆက်တိုက်ကစားခဲ့ရခြင်းလည်း ဖြစ်သည်။
အာစင်ဝင်းဂါးက “ဒီလောက် ခက်ခဲကြမ်းတမ်းတဲ့အခြေအနေမျိုးမှာ ဟာရီကိန်း ပြန်မကစားသင့်သေးပါဘူး။ သူ့ရဲ့ ဒဏ်ရာအခြေအနေက အခုအချိန်မှာ အဆင်သင့်မဖြစ်သေးဘူး။ ကျွန်တော့်အမြင်အရဆိုရင် သူက အခုအချိန်အထိ ဒဏ်ရာပြဿနာကို ခံနေရဆဲဖြစ်ပြီး အလွယ်တကူလဲတာ၊ ပြင်းပြင်းထန်ထန်မကန်နိုင်တာတွေ ရှိနေပါတယ်”ဟု ပြောကြားခဲ့သည်။
အသက် (၂၇)နှစ်အရွယ်ရှိ အင်္ဂလန်တိုက်စစ်မှူး ဟာရီကိန်းသည် ယခုရာသီတွင် စပါးအသင်းအတွက် ခြေစွမ်းပြနေပြီး ပြိုင်ပွဲစုံ (၃၂)ပွဲတွင် (၂၁)ဂိုး သွင်းယူထားသည်။
