မန်စီးတီးအသင်းနည်းပြ ဂွါဒီယိုလာက စပါးတိုက်စစ်မှူး ဟာရီကိန်းကို ခေါ်ယူရန် စိတ်ဝင်စားကြောင်း ဝန်ခံပြောကြားခဲ့သည်။
ပရီးမီးယားလိဂ် လက်ရှိချန်ပီယံ မန်စီးတီးအသင်းသည် အက်စတွန်ဗီလာအသင်းမှ အင်္ဂလန်ကွင်းလယ်ကစားသမား ဂရီးလစ်ရှ်ကို ဗြိတိန်စံချိန်တင် ပြောင်းရွှေ့ကြေး ပေါင်သန်း (၁၀၀)ဖြင့် ခေါ်ယူပြီးနောက် စပါးတိုက်စစ်မှူး ဟာရီကိန်းကိုပါ ခေါ်ယူရန် စီစဉ်နေကြောင်း သိရသည်။
ဟာရီကိန်းကိုယ်တိုင်ကလည်း စပါးအသင်းမှထွက်ခွာခွင့်တောင်းထားပြီး သြဂုတ်လ (၂)ရက်တွင် အသင်းနှင့်ပူးပေါင်းရမည်ဖြစ်သော်လည်း လက်ရှိအချိန်အထိ ပူးပေါင်းမရှိသေးသဖြင့် စပါးအသင်းအားပေးသူ ပရိသတ်များ၏ ဒေါသထွက်ခြင်းကိုပင် ခံနေရသည်။
ဂွါဒီယိုလာက စပါးအသင်းအနေဖြင့် ဟာရီကိန်းအတွက် ညှိနှိုင်းမှုများကို လက်ခံခြင်းမရှိသေးကြောင်း ပြောကြားခဲ့ခြင်းဖြစ်သည်။
“ဟာရီကိန်းက စပါးအသင်းရဲ့ ကစားသမား ဖြစ်ပါတယ်။ တကယ်လို့ စပါးအသင်းကသာ သူ့အတွက် ညှိနှိုင်းမှုတွေကို လက်မခံဘူးဆိုရင် အားလုံးက ပြီးသွားပါပြီ။ တကယ်လို့ စပါးအသင်းအနေနဲ့ ဟာရီကိန်းရဲ့ အပြောင်းအရွှေ့အတွက် လက်ခံဆွေးနွေးမယ်ဆိုရင် သူ့ကို လိုချင်တဲ့အသင်းတွေအများကြီး ရှိပါတယ်။ အဲဒီအသင်းတွေထဲမှာ ကျွန်တော်တို့ မန်စီးတီးအသင်းလည်း ပါပါတယ်။ ဒါပေမဲ့ ဟာရီကိန်းရဲ့အပြောင်းအရွှေ့က စပါးအသင်းအပေါ်မှာ မူတည်ပါတယ်”ဟု ဂွါဒီယိုလာက ပြောကြားခဲ့သည်။
ထို့ပြင် ဂွါဒီယိုလာက ဘာစီလိုနာအသင်းနှင့် လမ်းခွဲခဲ့သည့် မက်ဆီကို ခေါ်ယူမည်မဟုတ်ကြောင်းလည်း ပြောကြားခဲ့သည်။
