ဘာစီလိုနာအသင်းသည် သြဂုတ်လ (၂) ရက်နေ့တွင် အာဂျင်တီးနားတိုက်စစ်မှူး မက်ဆီကို စာချုပ်သစ် ချုပ်ဆိုမည်ဖြစ်ကြောင်း စပိန်အားကစားသတင်းစာ Sport က ဖော်ပြခဲ့သည်။
အသက် (၃၄)နှစ်အရွယ်ရှိ မက်ဆီသည် ဇွန်လ (၃၀)ရက်တွင် ဘာစီလိုနာအသင်းနှင့် ချုပ်ဆိုထားသည့် စာချုပ်သက်တမ်းကုန်ဆုံးပြီးနောက် အသင်းလက်မဲ့ဖြစ်နေသူဖြစ်သည်။
သို့သော် ဥရောပအားကစားမီဒီယာများ၏ ဖော်ပြချက်အရ အာဂျင်တီးနားတိုက်စစ်မှူး မက်ဆီသည် ဘာစီလိုနာအသင်းနှင့် (၅)နှစ်သက်တမ်းရှိ စာချုပ်သစ်တစ်ရပ် ချုပ်ဆိုသွားရန် သဘောတူညီမှုရရှိထားပြီဖြစ်ကြောင်း သိရှိရသည်။
မက်ဆီသည် ဘာစီလိုနာအသင်းနှင့် စာချုပ်သစ်ချုပ်ဆိုရန်အတွက် လက်ရှိရရှိနေသည့် တစ်ပတ်လစာ ယူရို(၁)သန်းကို ထက်ဝက်လျှော့ယူသွားမည်ဖြစ်ကြောင်း သိရှိရသည်။
ဘာစီလိုနာ အသင်းဥက္ကဋ္ဌ လာပေါ်တာသည် မက်ဆီကို စာချုပ်သစ်ချုပ်ဆိုနိုင်မည်ဟု ယုံကြည်ကြောင်း မကြာခဏပြောဆိုလေ့ရှိပြီး ယခုအခါ သြဂုတ်လ (၂)ရက်တွင် မက်ဆီကို စာချုပ်သစ်ချုပ်ဆိုကြောင်း တရားဝင်ကြေညာရန် စီစဉ်လျက်ရှိနေကြောင်း Sport က ဖော်ပြခဲ့သည်။
လာပေါ်တာက ”ကစားသမား(မက်ဆီ)က သူ့အနေနဲ့ အသင်းမှာ ဆက်နေချင်တယ်လို့ အမြဲတမ်းပြောဆိုနေသလို၊ ကျွန်တော်တို့ရဲ့ ညှိနှိုင်းမှုတွကလည်း တိုးတက်နေပါတယ်။ အသင်းဒါရိုက်တာတွေကလည်း မက်ဆီကို စာချုပ်သစ်ချုပ်ဆိုုဖို့ အကောင်းဆုံးလုပ်ဆောင်နေကြပါတယ်။ ကျွန်တော်တို့ အားလုံး မက်ဆီကို အသင်းမှာ ဆက်ရှိနေဖို့ မျှော်လင့်နေပြီး သူ့အနေနဲ့ ဘာစီလိုနာအသင်းမှာ နှစ်ပေါင်းများစွာ ကစားနိုင်အောင် ကျွန်တော်တို့ စီစဉ်နေပါတယ်”ဟု ပြောကြားခဲ့သည်။
ဘာစီလိုနာအသင်းသည် လာလီဂါ၏ လစာနှုန်းထားကန့်သတ်မှုစည်းမျဉ်းများကြောင့် မက်ဆီကို စာချုပ်သစ်ချုပ်ဆိုရန် ရုန်းကန်နေရသလို၊ ယခုနွေရာသီတွင် ခေါ်ယူထားသည့် ကစားသမားသစ်များကိုလည်း လာလီဂါတွင် မှတ်ပုံတင်နိုင်ခြင်း မရှိသေးကြောင်း သိရသည်။
ထို့ကြောင့် ဘာစီလိုနာအသင်းသည် ဂရီးဇ်မန်း၊ ကော်တင်ဟို၊ အမ်တီတီတို့အပါအဝင်ကစားသမားအချို့ကို ရောင်းချရန် စီစဉ်နေသလို၊ တစ်ဖက်တွင်လည်း အသင်းရှိ ကစားသမားများကို လစာလျှော့ချရန်အတွက် ဆွေးနွေးမှုများ ရှိနေကြောင်း စပိန်မီဒီယာများက ဖော်ပြခဲ့သည်။
