ဝေးလ်စ်ဝါရင့်တောင်ပံကစားသမား ဂါရတ်ဘေးလ်က လက်ရွေးစင်အသင်းမှ အနားယူတော့မည်ဆိုသော သတင်းများကို ငြင်းဆန်ခဲ့ပြီး နိုင်ငံအတွက် ကစားနိုင်သမျှ ကစားသွားမည်ဟု ပြောကြားခဲ့သည်။
ဝေးလ်စ်အသင်းသည် နိုဝင်ဘာ (၂၉) ရက်က ကစားခဲ့သည့် ကမ္ဘာ့ဖလားပွဲစဉ်တွင် အင်္ဂလန်အသင်းကို (၀-၃) ဂိုးဖြင့် ရှုံးနိမ့်သဖြင့် အုပ်စုအဆင့်မှ ထွက်ခွာခဲ့ရသည်။
အဆိုပါပွဲစဉ်တွင် ဘေးလ်သည် ပထမပိုင်း၌ ဒဏ်ရာပြဿနာကြောင့် လူစားလဲခဲ့ရသည်။
အဆိုပါပွဲစဉ်အပြီးတွင် ဂါရတ်ဘေးလ်က ”ဝေးလ်စ်အသင်းအတွက် ကျွန်တော် ကစားနိုင်သမျှ ကစားဦးမှာပါ။ ကျွန်တော်တို့အနေနဲ့ မတ်လမှာ ယူရို-၂၀၂၄ ခြေစစ်ပွဲကစားရမှာပါ။ အုပ်စုအဆင့်ကနေ ထွက်ရလို့ စိတ်ပျက်ရပေမဲ့ ကမ္ဘာ့ဖလားမှာ ကစားရလို့ဂုဏ်ယူပါတယ်”ဟု ဆိုခဲ့သည်။
၎င်းသည် ဝေးလ်စ်အတွက် (၁၁၁) ပွဲတွင် (၄၁)ဂိုးသွင်းထားပြီး အသင်းသမိုင်း၌ ပွဲအများဆုံးနှင့် ဂိုးအများဆုံးသွင်းသူအဖြစ် ရပ်တည်နေသည်။
