ဝေါ်လ်ကာသည် အမြန်ဆုံးကစားသမားဖြစ်ပြီး ဘာပေကို တားဆီးနိုင်လိမ့်မည်ဟု ကယ်လ်ဗင်ဖီးလစ် ထောက်ခံ

အင်္ဂလန်ကွင်းလယ်လူ ကယ်လ်ဗင်ဖီးလစ်က မန်စီးတီးအသင်းဖော်နောက်ခံကစားသမား ဝေါ်လ်ကာသည် မိမိမြင်ဖူးသမျှထဲတွင် အမြန်ဆုံးကစားသမားဖြစ်ပြီး ပြင်သစ်တိုက်စစ်မှူး ဘာပေကို တားဆီးနိုင်လိမ့်မည်ဟု ထောက်ခံပြောကြားခဲ့သည်။ 

အင်္ဂလန်အသင်းသည် ၂၀၂၂ ကမ္ဘာ့ဖလား ကွာတားဖိုင်နယ်ပွဲစဉ်အဖြစ် လက်ရှိ ကမ္ဘာ့ဖလားချန်ပီယံ ပြင်သစ်အသင်းနှင့် ဒီဇင်ဘာ ၁၀ ရက် (ယနေ့) တွင် Al Bayt Stadium ၌ ကစားရမည်ဖြစ်သည်။ 

ပြင်သစ် တိုက်စစ်မှူး ဘာပေသည် ယခုကမ္ဘာ့ဖလား ပြိုင်ပွဲတွင် ငါးဂိုးအထိ သွင်းယူထားပြီး ဂုုိးသွင်းအများဆုံးအဖြစ် ရပ်တည်နေရာ အင်္ဂလန်- ပြင်သစ်ပွဲတွင် ဘာပေနှင့် ဝေါ်လ်ကာတို့၏ ထိပ်တိုက်တွေ့ဆုံမှုမှာ စိတ်ဝင်စားစရာဖြစ်လာခဲ့သည်။ အင်္ဂလန်ကွင်းလယ်လူ ကယ်လ်ဗင်ဖီးလစ်ကမူ ဝေါ်လ်ကာသည် ဘာပေထက် အပြေးမြန်သူဖြစ်ပြီး ၎င်းကို တားဆီးနိုင်မည်ဟု ပြောကြားခဲ့ခြင်းဖြစ်သည်။ 

ကယ်လ်ဗင်ဖီးလစ်က “ဝေါ်လ်ကာက ကျွန်တော် မြင်ဖူးသမျှ ဘောလုံးသမားတွေထဲမှာ အပြေးအမြန်ဆုံး ကစားသမားပါ။ လူတွေက ဝေါ်လ်ကာ ဘယ်လောက်အပြေးမြန်သလဲလို့ ကျွန်တော့်ကို မေးလေ့ရှိတယ်။ ဒါပေမဲ့ သူ့ရဲ့အမြန်နှုန်းကို စကားလုံးတွေနဲ့ ဖော်ပြလို့ မရနိုင်ပါဘူး။ ထရိန်နင်မှာ One by One ပြိုင်ပြေးကြချိန်မှာ ဝေါ်လ်ကာ ဘယ်လောက်မြန်တယ်ဆိုတာကို မြင်တွေ့ရလေ့ ရှိပါတယ်။ ကျွန်တော်ကတော့ ဘာပေကို တားဆီးဖို့အတွက် ဝေါ်လ်ကာထက်ပိုကောင်းတဲ့သူ မရှိဘူးလို့ထင်တယ်။ သူက အရမ်းကောင်းတဲ့ကစားသမားဖြစ်ပြီး ဘာပေထက်လည်း ပိုမြန်ပါတယ်”ဟု ပြောကြားခဲ့သည်။