လီဗာပူးဟာ မနေ့ညက အန်ဖီးမှာ အာဆင်နယ်ကို ၃ ဂိုး ၁ ဂိုး နဲ့ အနိုင် ရရှိခဲ့ပြီး ဒီရာသီ ပရီးမီးယားလိဂ်မှာ ၃ ပွဲ ကစား ရာနှုန်းပြည့် နိုင်ပွဲကို ရယူ နိုင်ခဲ့ပါတယ်။ ယာဂန်ကလော့ရဲ့ အသင်းဟာ ပွဲအစကတည်းက ဂန်းနား တို့ကို ဘောလုံး ပိုင်ဆိုင်မှု အသာစီးနဲ့ တောက်လျှောက် ဖိကစားသွားခဲ့ကာ အခွင့်အရေးတွေ ဖန်တီး နိုင်ခဲ့ပေမယ့်လည်း တစ်ကယ်တန်း ဂိုးရသွားခဲ့တာ ကတော့ အာဆင်နယ် ဖြစ်ပြီး ရောဘတ်ဆန်ရဲ့ အမှားကနေ လက်ကာဇက်က ဦးဆောင်ဂိုး သွင်းယူ ခဲ့တာ ဖြစ်ပါတယ်။
ပွဲချိန် ၈၈ မိနစ်မှာ ကစားသမားသစ် ဂျိုတာဟာ ပင်နယ်တီ ဧရိယာထိပ်ကနေ half-volley နဲ့ လှလှပပ ကန်သွင်းယူ ခဲ့ကာ အသင်းသစ် အတွက် ပထမဦးဆုံး သွင်းဂိုးနဲ့ ပွဲသိမ်း ပေးခဲ့ပါတယ်။
ခရစ်ဆက်တန်က “ဒါဟာ လီဗာပူးအသင်းရဲ့ တကယ့် ဆရာကျကြတဲ့ ခြေစွမ်း ဖြစ်ပြီး ယာဂန်ကလော့ရဲ့ အသင်းဟာ မီခေးအာတီတာရဲ့ အသွင်သစ်နဲ့ အာဆင်နယ် အသင်းကို ကိုယ့်အခြေအနေ ကိုယ်သိ စေခဲ့ပါတယ်။ လီဗာပူးဟာ အန်ဖီးမှာ အာဆင်နယ်ကို လွှမ်းမိုး ကစားနိုင်ခဲ့ပြီး ဒါဟာ ပရီးမီးယားလိဂ် ချန်ပီယံ အသင်းရဲ့ အကောင်းဆုံး ရာသီသစ် စတင်မှု ဖြစ်ပါတယ်။
အခြား ဖလားပြိုင်ဘက်တွေ ရလဒ်တွေ မတည်မငြိမ် ဖြစ်နေချိန်မှာ…မန်စီးတီးတို့ လက်စတာကို ၅-၂ နဲ့ ရှုံးခဲ့သလိုမျိုးပေါ့…လီဗာပူးဟာ အမှတ်ပေးဖလား အတွက် ပြိုင်ဘက်တွေ အဓိက ကျော်ဖြတ်ရမယ့် အသင်း ဆိုတာကို ပြသထား ခဲ့ပါတယ်။ ဆာဒီယိုမာနေးဟာ တကယ့်ကို ဖြုံလောက်ပါတယ်။ နောက်ခံလူတွေ အနေနဲ့ သူ့ကို ကြောက်နေရမှာ ဖြစ်ပြီး အချက်အလက်တွေ အရ ဒီရာသီ ပရီးမီးယားလိဂ်မှာ ဘယ်ကစားသမားမှ final third မှာ မာနေးလောက် ဘောလုံး လုယူ နိုင်ခဲ့တာ မရှိပါဘူး။
ဒီယေဂိုဂျိုတာဟာ မာနေး အစားဝင်လာခဲ့ပြီး နောက်ဆုံး ၁၀ မိနစ် အတွင်းမှာ ဟက်ထရစ်တောင် ရနိုင်ခြေ ရှိခဲ့ပါတယ်။ သူဟာ လီဗာပူး အရန်အင်အားကို တောင့်တင်းစေခဲ့ပြီး တီယာဂို ကလည်း ဒီရာသီ ကလော့ရဲ့ အသင်းကို ကောင်းကောင်း ကူညီပေးနိုင်မယ့် ထိပ်တန်း ကစားသမား ဖြစ်ပါတယ်။
ဒါဟာ လီဗာပူး အတွက် လွယ်ကူတဲ့ ရာသီသစ် စတင်မှုတော့ မဟုတ်ပါဘူး။ ဒီရာသီ လီဗာပူးရဲ့ ပထမဦးဆုံး လိဂ်ပွဲစဉ် ၃ ပွဲဟာ လိဒ်ကို အိမ်ကွင်း ၊ ချဲလ်ဆီးကို အဝေးကွင်းနဲ့ အာဆင်နယ်ကို အိမ်ကွင်းမှာ ကစားရတဲ့ ပွဲစဉ်တွေ ဖြစ်ပါတယ်။
ဘယ်ပွဲမှာမဆို ခြေချော်လက်ချော် ဖြစ်သွားနိုင်ခြေ ရှိပေမယ့် လီဗာပူးဟာ ၃ ပွဲစလုံး အနိုင် ရရှိခဲ့ပါတယ်။ ပြီးခဲ့တဲ့ ရာသီက ဖြစ်ခဲ့တဲ့ ပုံအရ စီးတီးဟာ လီဗာပူးကို ဒီရာသီ လိဂ်ပြိုင်ပွဲမှာ လွတ်လွတ်ကျွတ်ကျွတ် ပြေးခွင့် ပြုလို့ မရဘူးဆိုတာ သိမှာပါ။ မေးခွန်းထုတ်ရမှာ ကတော့ ကလော့ရဲ့ အသင်းကို ဘယ်အသင်း တားဆီး နိုင်မလဲ ဆိုတာပါပဲ။
အာတီတာက သူ့ကစားသမားတွေ အနေနဲ့ လီဗာပူးလို အသင်းနဲ့ ရင်ဆိုင် ရမှာ ဘယ်လောက် အသားတကျ ဖြစ်ဖို့ လိုအပ်သလဲ ဆိုတဲ့ အကြောင်း ပြောခဲ့ပါတယ်။ လီဗာပူးနဲ့ အပြိုင် လိုက်ကစားဖို့ မဖြစ်နိုင်ဘူးဆိုတာ သူသိပါတယ်။ ဒ့ါကြောင့် အာတီတာဟာ ဘောလုံး ကိုင်ကစားရတာ နှစ်သက်ပေမယ့် ကလော့ရဲ့ အသင်းနဲ့ ရင်ဆိုင်ရာမှာ ဒါကို စွန့်လွှတ် ခဲ့ပါတယ်။
အမ်းမရိတ် ၊ ဝင်ဘာလေ တို့မှာ ရင်ဆိုင် ခဲ့တုန်းက ဒီဗျူဟာက အလုပ်ဖြစ်ခဲ့ပြီး အာဆင်နယ်ဟာ အဲဒီပွဲတွေမှာ ဘောလုံး ပိုင်ဆိုင်မှု ၃၁ ၊ ၄၀ ရာခိုင်နှုန်းတွေသာ ရှိခဲ့ပေမယ့် ရလဒ်ကောင်းတွေ ဖော်ဆောင် နိုင်ခဲ့ပါတယ်။
ဒါပေမယ့် ဒီနေ့မှာတော့ သူ့ရဲ့ game plan က အလုပ်မဖြစ် ခဲ့ပါဘူး။ အာဆင်နယ်ဟာ ဒီတစ်ကြိမ်မှာ ဘောလုံးပိုင်ဆိုင်မှု ၃၄% သာ ရှိခဲ့ပြီး အထူးသဖြင့် ပထမပိုင်းမှာ လီဗာပူးကို ဘာမှ ပြန်လည် တုန့်ပြန် နိုင်ခဲ့ခြင်း မရှိခဲ့ပါဘူး။ အူဘာမီယန်းဟာ ဂိုးသွင်းခွင့် ရဖို့ ရုန်းကန် ခဲ့ရပါတယ်။
လီဗာပူးဟာ အာဆင်နယ်ထက် ပိုကောင်းတဲ့ ကစားအား နဲ့ တစ်ပွဲလုံး ခြိမ်းခြောက်မှု များစွာ လုပ်ခဲ့ကာ ထိုက်တန်စွာ အနိုင် ရရှိခဲ့ပါတယ်။” လို့ သုံးသပ် သွားခဲ့ပါတယ်။
