ဝေးလ်စ်လက်ရွေးစင်အသင်းနည်းပြ ရိုင်ယန်ဂစ်က မန်ယူအသင်းအနေဖြင့် လီဗာပူးလ်၊ မန်စီးတီးတို့နှင့်အပြိုင် ပရီးမီးယားလိဂ်ချန်ပီယံဆုကို စိန်ခေါ်ရန်အတွက် ကစားသမားသစ် (၃)ဦး ခေါ်ယူရဦးမည်ဟု သုံးသပ်ပြောကြားခဲ့သည်။
မန်ယူအသင်းသည် ဇူလိုင် (၁၆)ရက်က ပဲလေ့စ်အသင်းကို အနိုင်ရပြီးနောက် ပြိုင်ပွဲစုံ ရှုံးပွဲမရှိစံချိန်မှာ (၁၉) ပွဲအထိ ရှိလာခဲ့သည်။ ပြီးခဲ့သည့် ဇန်နဝါရီအပြောင်းအရွှေ့ကာလတွင် ဘရူနိုဖာနန်ဒက်စ် ရောက်လာပြီးနောက် မန်ယူအသင်း၏ ခြေစွမ်းပိုင်းပိုကောင်းရော ရလဒ်ပိုင်းမှာ ကောင်းမွန်လာခဲ့သည်။
သို့သော် ရိုင်ယန်ဂစ်က လက်ရှိ မန်ယူအသင်းမှာ လီဗာပူးလ်နှင့် မန်စီးတီးတို့ကို ယှဉ်ပြိုင်ရန်မဖြစ်နိုင်သေးကြောင်း၊ အဆိုပါအသင်းများနှင့် ပရီးမီးယားလိဂ်ချန်ပီယံဆုကို အပြိုင်စိန်ခေါ်ရန်အတွက် ကစားသမားသစ် (၂)ဦး သို့မဟုတ် (၃)ဦး လိုအပ်နေသေးကြောင်း ပြောကြားခဲ့ခြင်း ဖြစ်သည်။
ရိုင်ယန်ဂစ်က “ကျွန်တော်တို့အသင်း(မန်ယူ)က မန်စီးတီး၊ လီဗာပူးလ်တို့ကို ယှဉ်ပြိုင်ဖို့အတွက် ကစားသမားသစ် (၂)ဦး ဒါမှမဟုတ် (၃)ဦး ခေါ်ယူဖို့ လိုအပ်နေသေးတယ်လို့ ကျွန်တော် ထင်ပါတယ်။ မန်ယူအသင်းရဲ့ စရိုက်လက္ခဏာကို ကျွန်တော်တို့ ပြန်တွေ့နေရပါပြီ။ ဘရူနိုဖာနန်ဒက်စ်က ခေါင်းဆောင်တစ်ဦးရဲ့ စရိုက်လက္ခဏာမျိုးရှိသူဖြစ်ပြီး မက်ဂွိုင်းရားက အသင်းခေါင်းဆောင်ကောင်းတစ်ယောက်ပါ။ အခုက သူတို့တင် မဟုတ်ဘဲ တစ်သင်းလုံး အရင်က မန်ယူအသင်းရဲ့ စိတ်ဓာတ်မျိုး ရှိနေကြပါပြီ။ မန်ယူအသင်းဟာ လမ်းကြောင်းမှန်ပေါ် ဦးတည်နေတာ သေချာပါတယ်။ ဒါပေမဲ့ သူတို့အနေနဲ့ ကစားသမား (၃)ဦးလောက် ခေါ်ဖို့လိုတယ်လို့ ကျွန်တော် ထင်တယ်”ဟု ပြောကြားခဲ့သည်။
မန်ယူအသင်းသည် လာမည့်နွေရာသီအပြောင်းအရွှေ့စျေးကွက်တွင် ဒေါ့မွန်တောင်ပံကစားသမား ဆန်ချို၊ ဝုလ်ဗ်တိုက်စစ်မှူး ဟီမင်နက်ဇ်၊ အင်တာမီလန်နောက်ခံလူ ရှာကရီညာနှင့် နာပိုလီနောက်ခံလူ ကူလီဘလီတို့ကို ခေါ်ယူရန် ပစ်မှတ်ထားနေကြောင်း ဗြိတိန်သတင်းစာ Daily Mail က ဖော်ပြခဲ့သည်။
