ပွဲအပြီးသတင်းစာရှင်းလင်းပွဲတွင် လမ်းပတ်က “လီဗာပူးလ်အသင်းက လိဂ်ပြိုင်ပွဲမှာ သန့်သန့်ရှင်းရှင်းကစားပြီးတော့ အနိုင်ရခဲ့တာပါ။ ဒါပေမဲ့ အရမ်းကြီးထောင်လွှားနေလို့ မရပါဘူး” ဟု ဝေဖန်ပြစ်တင်ခဲ့သည်။
လီဗာပူးလ်အသင်း စိတ်ကြီးဝင်နေသည်ဟု ချယ်လ်ဆီးအသင်းနည်းပြ လမ်းပတ်၏ဝေဖန်မှုကို လီဗာပူးလ်အသင်းနည်းပြ ယာဂန်ကလော့ပ်က တုံ့ပြန်ခဲ့ပြီး ၎င်းအနေဖြင့် သင်ယူစရာများရှိနေသေးကြောင်း သုံးသပ်ပြောကြားခဲ့သည်။
ပရီးမီးယားလိဂ်ပွဲစဉ် ၃၇ အဖြစ် ပြီးခဲ့သည့်ဗုဒ္ဓဟူးနေ့က လီဗာပူးလ်နှင့် ချယ်လ်ဆီးအသင်းတို့ အန်ဖီးလ်ကွင်း၌ ယှဉ်ပြိုင်ကစားခဲ့ပြီး လီဗာပူးလ်အသင်းက (၅-၃) ဂိုးဖြင့် အနိုင်ရကာ ပွဲအပြီးတွင် ချန်ပီယံဖလားလက်ခံရယူခဲ့သည်။ ယင်းပွဲတွင် လီဗာပူးလ်အသင်းအတွက် ဒုတိယဂိုးကို အာနိုးလ် ပြစ်ဒဏ်ဘောမှတစ်ဆင့် သွင်းယူပြီးနောက် အောင်ပွဲခံစဉ် လမ်းပတ်နှင့် ကလော့ပ်၏ လက်ထောက် နည်းပြ လင်ဒါတို့ အချင်းများခဲ့ခြင်းဖြစ်သည်။ ထို့ပြင် ပွဲအပြီးသတင်းစာရှင်းလင်းပွဲတွင် လမ်းပတ်က “လီဗာပူးလ်အသင်းက လိဂ်ပြိုင်ပွဲမှာ သန့်သန့်ရှင်းရှင်းကစားပြီးတော့ အနိုင်ရခဲ့တာပါ။ ဒါပေမဲ့ အရမ်းကြီးထောင်လွှားနေလို့ မရပါဘူး” ဟု ဝေဖန်ပြစ်တင်ခဲ့သည်။
သို့ဖြစ်ရာ လမ်းပတ်၏ဝေဖန်ပြစ်တင်မှုကို ယာဂန်ကလော့ပ်က “ကျွန်တော့်ကိုရော ကျွန်တော့်နည်းပြအဖွဲ့ကိုပါ ဒီလိုပုံစံမျိုးနဲ့ တိုက်ခိုက်လို့မရပါဘူး။ ဘာဖြစ်လို့လဲဆိုတော့ ကျွန်တော်တို့က စိတ်ကြီးဝင်နေတာမဟုတ်လို့ပါ။ ဖရန့်ဆီမှာ ယှဉ်ပြိုင်လိုစိတ်ရှိတဲ့ ခံစားချက်တွေ အထင်းသားမြင်နေရပြီး ကျွန်တော့် အနေနဲ့ သူ့ကို လေးစားမှုထားပါတယ်။ ကျွန်တော့်အမြင်ပြောရရင်တော့ ဒီလိုအခြေအနေမျိုးမှာ ကိုယ်ဖြစ်ချင်တာကို ကောင်းကောင်း မွန်မွန်ပြောလို့ရပါတယ်။ ကျွန်တော့်အတွက် တော့ ပွဲပြီးတာနဲ့ အားလုံးပြီးသွားတာပါပဲ။ ဒါတွေက စိတ်ခံစားချက်သက်သက်ပဲဆိုတာ အရင်ကလည်း အများကြီးပြောဖူးပါတယ်။ သူက ဒီနေရာကိုရောက်လာတာ နိုင်ပွဲရယူဖို့ ဒါမှမဟုတ် ချန်ပီယံလိဂ်ဝင်ခွင့်အတွက် ရမှတ်တစ်မှတ်ရယူဖို့ပါ။ ဒါကို ကျွန်တော်လေးစားမှု ရှိပါတယ်။ ဒါပေမဲ့ ပွဲသိမ်းခရာမှုတ်ချိန်မှာ အပြီးသတ်ရမယ့်ဟာတွေကိုတော့ သင်ယူဖို့ လိုပါသေးတယ်။ အဲဒီအရာကို သူမလုပ်ခဲ့ပါဘူး” ဟု တုံ့ပြန်ပြောကြားခဲ့သည်။
လမ်းပတ်ကလည်း လီဗာပူးလ်အသင်း နည်းပြအဖွဲ့ဝင်အနေဖြင့် ကွင်းဘေးစည်းတွင် လိုက်နာရမည့် စည်းကမ်းချိုးဖောက်၍ မိမိထံ ပြေးလာသဖြင့် ပြဿနာဖြစ်ပွားခြင်းဖြစ်ကြောင်း၊ မိမိသုံးနှုန်းခဲ့သည့်စကားအတွက် နောင်တရမိကြောင်း ပြောကြားခဲ့သည်။
