ယခုရာသီ ပရီးမီးယားလိဂ်ချန်ပီယံ လီဗာပူးလ်အသင်း၏ ဆုချီးမြှင့်ပွဲအခမ်းအနားကို လာမည့် ဗုဒ္ဓဟူးနေ့၌ ယှဉ်ပြိုင်ကစားမည့် ချယ်လ်ဆီးနှင့်ပွဲအပြီးတွင် အန်ဖီးလ်ကွင်း၌ ပြုလုပ်သွားမည်ဖြစ်ကြောင်း သိရသည်။
ယခုရာသီ ပရီးမီးယားလိဂ်ချန်ပီယံ လီဗာပူးလ်အသင်း၏ ဆုချီးမြှင့်ပွဲအခမ်းအနားကို လာမည့် ဗုဒ္ဓဟူးနေ့၌ ယှဉ်ပြိုင်ကစားမည့် ချယ်လ်ဆီးနှင့်ပွဲအပြီးတွင် အန်ဖီးလ်ကွင်း၌ ပြုလုပ်သွားမည်ဖြစ်ကြောင်း သိရသည်။
လီဗာပူးလ်အသင်းသည် ပြိုင်ပွဲပြီးဆုံး ရန် (၇)ပွဲအလိုကတည်းက ပရီးမီးယားလိဂ်ချန်ပီယံအဖြစ် အဖြေပေါ်ခဲ့ပြီးဖြစ်သော်လည်း ဆုဖလားကိုင်မြှောက်၍ အောင်ပွဲခံရခြင်း မရှိသေးပေ။
ယခုအခါ နောက်ဆုံးအိမ်ကွင်းပွဲစဉ်၌ အောင်ပွဲခံရန် စီစဉ်ခဲ့ခြင်းဖြစ်ပြီး ယင်းပွဲတွင် အနိုင်ရရန် ကြိုးပမ်းသွားမည်ဟုလည်း နည်းပြ ယာဂန်ကလော့ပ်က ပြောကြားခဲ့သည်။
“ဒီအောင်ပွဲကို ပရိသတ်တွေ စောင့်နေခဲ့တာ နှစ်ပေါင်းများစွာ ရှိနေခဲ့ပါပြီ။ တချို့တွေ နှစ်(၃၀) လောက်ရှိပါပြီ။ ဒါကြောင့် ပရီးမီးယားလိဂ်ချန်ပီယံအဖြစ် အောင်ပွဲခံရမယ့်အခြေအနေဟာ ကျွန်တော်တို့အတွက် အလွန်အရေးပါတဲ့ အခိုက်အတန့်တစ်ခုဖြစ်ပါတယ်။ အောင်ပွဲမခံခင်မှာ ကျွန်တော်တို့ ပွဲတစ်ပွဲ ယှဉ်ပြိုင်ကစားသွားရမှာဖြစ်ပြီး အဲဒီပွဲကို အနိုင်ရအောင် ကြိုးစားသွားမှာပါ။ ဒီလိုအခြေအနေမျိုး ကျွန်တော့်ဘဝမှာ (၂)ကြိမ် ကြုံတွေ့ခဲ့ဖူးပါတယ်။ ဒါဟာ ခက်ခဲမှာပါ။ အထူးသဖြင့် ချန်ပီယံလိဂ်ဝင်ခွင့်အတွက် တိုက်ပွဲဝင်နေတဲ့ ချယ်လ်ဆီးအသင်းနဲ့ ရင်ဆိုင်ရမှာကြောင့်ပါ။ ဒါပေမဲ့ ဒီပွဲကို ကျွန်တော် အနိုင်ရချင်ပါတယ်”ဟု ယာဂန်ကလော့ပ်က ပြောကြားခဲ့သည်။
လီဗာပူးလ်အသင်းသည် အသင်း၏အောင်ပွဲကို မိမိနေအိမ်မှသာ မျှဝေခံစားရန် အသင်းပရိသတ်များကို တိုက်တွန်းထားကြောင်းလည်း သိရသည်။
လီဗာပူးလ်အသင်း၏ အဆိုပါအောင်ပွဲခံအခမ်းအနားတွင် ဂန္ထဝင်နည်းပြ ဒဲလ်ဂလစ်ရှ်က ကစားသမားများကို တစ်ဦးချင်းဆုတံဆိပ်များ ချီးမြှင့်မည်ဖြစ်ပြီး အသင်းခေါင်းဆောင် ဟန်ဒါဆန်က ဆုဖလားကို လက်ခံရယူမည်ဖြစ်ကြောင်းနှင့် ရုပ်သံမှထုတ်လွှင့် ပြသသွားမည်ဖြစ်ကြောင်း သိရသည်။
