ဒေါ့မွန်အသင်းသည် ဥရောပထိပ်သီးကလပ်များဖြစ်သည့် လီဗာပူးလ်နှင့် ရီးယဲလ်မက်ဒရစ်အသင်းတို့ ခေါ်ယူရန်ပစ်မှတ်ထားနေသည့် အသင်းလူငယ်ကွင်းလယ်ကစားသမား ဘယ်လင်ဟမ်ကို အနည်းဆုံး ယူရိုသန်း (၁၂၀) (ပေါင် ၁၀၃ သန်း) ရမှသာ ရောင်းချမည်ဟု စျေးနှုန်းသတ်မှတ်ခဲ့ကြောင်း ဂျာမန်သတင်းစာ Bild က ဖော်ပြခဲ့သည်။
အသက် (၁၉) နှစ်အရွယ်ရှိ အင်္ဂလန်လက်ရွေးစင်ဆယ်ကျော်သက်ကွင်းလယ်ကစားသမား ဘယ်လင်ဟမ်သည် ၂၀၂၀ နွေရာသီအပြောင်းအရွှေ့ကာလတွင် ဘာမင်ဂမ်အသင်းမှ ဒေါ့မွန်အသင်းသို့ ယူရို သန်း (၃၀) ဝန်းကျင်ဖြင့် ရောက်ရှိလာသူဖြစ်သည်။
၎င်းသည် ဒေါ့မွန်အသင်းတွင် (၂) ရာသီအတွင်း ပြိုင်ပွဲစုံ ပွဲ (၉၀) တွင် (၁၀) ဂိုးသွင်းယူကာ ခြေစွမ်းပြနိုင်ခဲ့ခြင်းကြောင့် ဥရောပထိပ်တန်းအသင်းများ၏ စိတ်ဝင်စားခြင်းကို ခံနေရခြင်းဖြစ်သည်။
ဘယ်လင်ဟမ်ကို ခေါ်ယူရန် လီဗာပူးလ်နှင့် ရီးယဲလ်အသင်းတို့က အဓိကစိတ်ဝင်စားနေခြင်းဖြစ်သည်။
လီဗာပူးလ်နှင့် ရီးယဲလ်အသင်းတို့သည် လာမည့် ၂၀၂၃ နွေရာသီတွင် ဘယ်လင်ဟမ်အား ခေါ်ယူရန်အတွက် ကမ်းလှမ်းဖွယ်ရှိသည်ဟု မီဒီယာများက ဖော်ပြနေကြသော်လည်း ရီးယဲလ်အသင်းသည် ယခု နွေတွင်ပင် ခေါ်ယူရန်စီစဉ်နေသည်ဟုလည်း သတင်းများ ထွက်ပေါ်နေသည်။
ထို့ကြောင့် ဒေါ့မွန်အသင်းသည် ဘယ်လင်ဟမ်ကို စျေးနှုန်းသတ်မှတ်ခဲ့ခြင်းဖြစ်ပြီး ယူရိုသန်း (၁၂၀) ထက်နည်းသည့် ပမာဏဖြင့် ရောင်းထုတ်မည်မဟုတ်ဟု သိရသည်။
