ဖူလ်ဟမ်အသင်း၏ ဆားဘီးယားလက်ရွေးစင်တိုက်စစ်မှူး မီထရိုဗစ်သည် လိဂ်ချန်ပီယံရှစ်ပြိုင်ပွဲ၏ တစ်နှစ်တာ အကောင်းဆုံးကစားသမားဆုကို ဆွတ်ခူးရရှိခဲ့ကြောင်း သိရှိရသည်။
မီထရိုဗစ်သည် ဖူလ်ဟမ်အသင်း ပရီးမီးယားလိဂ်သို့ တန်းတက်ခဲ့သလို၊ လိဂ်ချန်ပီယံရှစ်ချန်ပီယံအဖြစ် ဖြတ်သန်းခဲ့သည့်ခရီးတွင် အကောင်းဆုံးပုံစံပြသနိုင်ခဲ့ပြီး သွင်းဂိုး (၄၁)ဂိုးအထိ သွင်းယူပေးနိုင်ခဲ့သူလည်းဖြစ်သည်။
ယခုရာသီ လိဂ်ချန်ပီယံရှစ်ပြိုင်ပွဲသည် ရာသီကုန်ရန် (၂)ပွဲကျန် ရှိနေသေးပြီး မီထရိုဗစ်သည် ဒုတိယကမ္ဘာစစ်အပြီးကတည်းက တစ်ရာသီအတွင်း သွင်းဂိုး (၄၂)ဂိုးဖြင့် စံချိန်တင်ထားသည့် ဂိုင်းဝှစ်တမ်ဂမ်၏ စံချိန်ကို မီရန် တစ်ဂိုးသာလိုတော့သည်ဟုလည်း သိရှိရသည်။
ယခုအခါ လိဂ်ချန်ယံရှစ်၏ တစ်နှစ်တာအကောင်းဆုံးဆုကို ဆွတ်ခူးနိုင်ခဲ့ပြီဖြစ်သည့် မီထရိုဗစ်က ”ကျွန်တော်အရမ်းဝမ်းသာပါတယ်။ အသင်းကိုလည်း အများကြီး အကူအညီပေးနိုင်ခဲ့ပါတယ်”ဟု ပြောကြားခဲ့သည်။
လိဂ်ချန်ပီယံရှစ်ပြိုင်ပွဲ၏ တစ်နှစ်တာအကောင်းဆုံးနည်းပြဆုကိုမူ လူတန်တောင်းအသင်း၏ နည်းပြဖြစ်သူ နာသန်ဂျုံးစ်က ဆွတ်ခူးခဲ့ကြောင်း သိရှိရသည်။
