လိဂ်ချန်ပီယံရှစ်၌ခြေစွမ်းပြခဲ့သည့် ဘရန့်ဖို့ဒ်တိုက်စစ်မှူး ဝက်ကင်းစ်ကို ကလပ်စံချိန်တင်ပြောင်းရွှေ့ကြေးဖြင့် ဗီလာ ခေါ်ယူ

အက်စတွန်ဗီလာအသင်းသည် ပြီးခဲ့သည့်ရာသီက လိဂ်ချန်ပီယံရှစ်ပြိုင်ပွဲတွင် ခြေစွမ်းပြဂိုးများသွင်းယူခဲ့သည့် ဘရန့်ဖို့ဒ်တိုက်စစ်မှူး ဝက်ကင်းစ်(၂၄ နှစ်)ကို ကလပ်စံချိန်တင်ပြောင်းရွှေ့ကြေး ပေါင်(၃၃)သန်းဖြင့် ခေါ်ယူခဲ့ကြောင်း သိရှိရသည်။

ပြီးခဲ့သည့်ရာသီ လိဂ်ချန်ပီယံရှစ်တွင်(၂၆)ဂိုးအထိသွင်းယူပြီး ပူးတွဲဂိုးသွင်းအများဆုံးဖြစ်ခဲ့သူ ဝက်ကင်းစ်အတွက် ဗီလာအသင်းသည် ကနဦး ပြောင်းရွှေ့ကြေး ပေါင် (၂၈)သန်းပေးချေရမည်ဖြစ်ပြီး၊ ကျန် (၅)သန်းကို Add-ons ကြေးအဖြစ် ပေးချေရမည်ဖြစ်သည်။

လက်ရှိ ဗီလာအသင်းနည်းပြ ဒင်းန်စမစ် ဘရန့်ဖို့ဒ်အသင်းကို ကိုင်တွယ်ခဲ့စဉ်က ဝက်ကင်းစ်သည် သူ၏လက်အောက်၌ ကစားခဲ့ဖူးသူဖြစ်ပြီး ယခုဗီလာအသင်းတွင် ၎င်းတို့ (၂)ဦး ပြန်လည်လက်တွဲခဲ့ခြင်းဖြစ်သည်။

ဗီလာအသင်းသည် ပြီးခဲ့သည့်ရက်ပိုင်းက နော်တင်ဟမ်ဖောရက်စ်နောက်ခံလူ မတ်တီကက်ရှ်ကို ပေါင်(၁၆)သန်းဖြင့်ခေါ်ယူပြီးနောက် ဝက်ကင်းစ်မှာ ယခုရာသီ ဒုတိယခေါ်ယူမှုဖြစ်ခဲ့သည်။

ဝက်ကင်းစ်အတွက် ဗီလာအသင်းပေးချေရသည့် ပြောင်းရွှေ့ကြေးပမာဏမှာ လိဂ်ချန်ပီယံရှစ်ကစားသမားတစ်ဦးအနေဖြင့် အမြင့်ဆုံးအဖြစ် မှတ်တမ်းဝင်ခဲ့သည်။

ပြီးခဲ့သည့်လက ဘုန်းမောက်နောက်ခံလူ နာသန်အကီကို မန်စီးတီးအသင်းက ပေါင် သန်း (၄၀)ဖြင့်လည်းကောင်း၊ နယူးကာဆယ်ကွင်းလယ်လူ ဆစ်ဆိုကိုကို စပါးအသင်းက ပေါင် သန်း ၃ဝဖြင့်လည်းကောင်း လိဂ်ချန်ပီယံရှစ်ကလပ်များမှ ခေါ်ယူခဲ့သော်လည်း ယင်းကစားသမား(၂)ဦးမှာ လိဂ်ချန်ပီယံရှစ်၌ မကစားဖူးသူများဖြစ်သည်။

အက်စတွန်ဗီလာအသင်း၏ ယခင်ပြောင်းရွှေ့ကြေးစံချိန်ရှင်မှာ ဘရာဇီးလ်တိုက်စစ်မှူး ဝက်စလေဖြစ်ပြီး ပြီးခဲ့သည့်နှစ်နွေရာသီက ပေါင် (၂၂)သန်းဖြင့် ကလပ်ဘရုဂေးအသင်းမှ ခေါ်ယူခဲ့ခြင်းဖြစ်ကြောင်း သိရသည်။