၂၀၁၉-၂၀ ရာသီ စပိန်လာလီဂါချန်ပီယံ ရီးယဲလ်မက်ဒရစ်အသင်းသည် လာလီဂါပွဲစဉ် (၃၈)တွင် လီဟာနက်စ်အသင်းအား (၂-၂)ဂိုးဖြင့် သရေကျပြီးနောက် ယခုရာသီ အသင်း၏လာလီဂါပေးဂိုးမှာ (၂၅)ဂိုးသာရှိခဲ့သည်။
ထို့ကြောင့် လာလီဂါပြိုင်ပွဲအား စနစ်သစ်ဖြင့် စတင်ကျင်းပသည့်ကာလအတွင်း ရီးယဲလ်အသင်း၏ ပေးဂိုးအနည်းဆုံးရာသီအဖြစ် စံချိန်တင်ခဲ့ကြောင်း သိရသည်။
ရီးယဲလ်မက်ဒရစ်အသင်းသည် လာလီဂါပြိုင်ပွဲအား ကလပ်အသင်း (၂၀)၊ ပွဲစဉ် (၃၈)ပွဲ ဖြင့် စနစ်သစ်ပုံစံစတင်ကျင်းပသည့် ၁၉၈၇-၈၈ ရာသီက လာလီဂါပေးဂိုး (၂၆)ဂိုးသာပေးခဲ့ရပြီး အကောင်းဆုံး ခံစစ်မှတ်တမ်းကို ပိုင်ဆိုင်ခဲ့သည်။
ယခုရာသီ ရီးယဲလ်မက်ဒရစ်အသင်းအနေဖြင့် တစ်ရာသီအတွင်း လာလီဂါပေးဂိုး (၂၅)ဂိုးသာ ရှိခဲ့သောကြောင့် လွန်ခဲ့သည့် (၃၂)နှစ်က အသင်း၏ အကောင်းဆုံးပေးဂိုးစံချိန်ထက် (၁)ဂိုးလျော့နည်းကာ စံချိန်သစ်တင်နိုင်ခဲ့ခြင်းဖြစ်သည်။
ရီးယဲလ်မက်ဒရစ်အသင်း ခံစစ်ပိုင်းသည် ယခုရာသီတွင် အကောင်းဆုံးစွမ်းဆောင်ရည်ကိုရရှိခဲ့ပြီး အသင်း၏ ချန်ပီယံပြေးလမ်းတွင် အဓိကကျသည့် အစိတ်အပိုင်းလည်းဖြစ်ခဲ့သည်။
ရီးယဲလ်မက်ဒရစ်အသင်းအနေဖြင့် ယခုရာ သီ လာလီဂါပြိုင်ပွဲတွင် ပေးဂိုး (၂၅)ဂိုးသာပေးခဲ့ရပြီး ဥရောပထိပ်တန်းလိဂ် (၅)ခုတွင် ပေးဂိုးအနည်းဆုံးအသင်းအဖြစ် ရပ်တည်နိုင်ခဲ့သည်။
(ပြင်သစ်လီဂူးချန်ပီယံ PSG အသင်းသည် ၂၄ ဂိုးသာ ပေးခဲ့ရသော်လည်း လီဂူးပြိုင်ပွဲမှာ ပွဲစဉ် ၂၈ အပြီးတွင် ရပ်နားခဲ့သည်။)
ထို့ပြင် ရီးယဲလ်မက်ဒရစ်အသင်းအနေဖြင့် ဂိုးမပေးရသည့်ပွဲစဉ် (Clean Sheet) အရေအတွက်မှာလည်း (၁၉)ပွဲအထိ ရှိခဲ့ပြီး ဥရောပထိပ်တန်းလိဂ် (၅)ခုတွင် အများဆုံးအရေအတွက်လည်းဖြစ်ခဲ့သည်။
