လာမည့်အပတ်တွင် ဆန်ချို၊ ကာဗာနီတို့ အသင်းနှင့်ပူးပေါင်းမည်ဟု မန်ယူနည်းပြ ဆိုးလ်ရှား အတည်ပြု

မန်ယူအသင်းနည်းပြ ဆိုးလ်ရှားက ဆန်ချိုနှင့် ကာဗာနီတို့သည် လာမည့်အပတ်တွင် အသင်းနှင့်ပူးပေါင်းမည်ဖြစ်ကြောင်း အတည်ပြုပြောကြားခဲ့သည်။

ယခုနွေရာသီအပြောင်းအရွှေ့ကာလတွင် ခေါ်ယူထားသည့် အင်္ဂလန်တောင်ပံကစားသမား ဆန်ချိုနှင့် ဥရုဂွေးဝါရင့်တိုက်စစ်မှူး ကာဗာနီတို့သည် အားလပ်ရက်အပန်းဖြေနေကြပြီး လက်ရှိအချိန်အထိ အသင်းနှင့်ပူးပေါင်းခြင်းမရှိသေးကြောင်း သိရှိရသည်။

သို့သော် ၎င်းတို့အနေဖြင့် လာမည့်အပတ်တွင် အသင်းနှင့်ပူးပေါင်းမည်ဖြစ်ကြောင်း ဆိုးလ်ရှားက ပြောကြားခဲ့ခြင်းဖြစ်သည်။

ဆိုးလ်ရှားက “ကျွန်တော်တို့ လာပူးပေါင်းတဲ့အခါ သူတို့အနေနဲ့ ကြ့ံခိုင်မှုပြည့်ဝနေဖို့ မျှော်လင့်ပါတယ်။ စနေ၊ တနင်္ဂနွေအပြီးမှာ သူတို့ဟာ အသင်းနဲ့ပူးပေါင်းပါလိမ့်မယ်။ သူတို့အနေနဲ့ အခြေအနေအမျိုးမျိုးကြောင့် အခုအချိန်ထိ အသင်းနဲ့ပူးပေါင်းခြင်းမရှိသေးတာပါ။ ဒါပေမဲ့ ရာသီက ကြာရှည်လွန်းတာကြောင့် သူတို့အနေနဲ့ အားလပ်ရက်နည်းနည်း ပိုယူတာ ကိစ္စမရှိပါဘူး”ဟု ပြောကြားခဲ့သည်။

ဆန်ချိုသည် အင်္ဂလန်အသင်းနှင့်အတူ ယူရို-၂၀၂၀ ပြိုင်ပွဲကို ကစားခဲ့ပြီး ကာဗာနီကလည်း ဥရုဂွေးအသင်းနှင့် ကိုပါအမေရိကပြိုင်ပွဲကို ကစားခဲ့သည်။

မန်ယူအသင်းသည် ၂၀၂၁-၂၂ ရာသီ ပရီးမီးယားလိဂ်အဖွင့်ပွဲအဖြစ် သြဂုတ်လ (၁၄)ရက်တွင် လိဒ်စ်အသင်းကို အိမ်ကွင်း၌ လက်ခံကစားရမည်ဖြစ်သည်။