ဟယ်ရီရက်နက်ဟာ လာမည့် ရာသီ မန်စီးတီးရဲ့ အဓိက ဖလား ပြိုင်ဘက်ကို ပြောသွားခဲ့ပြီး အာဆင်နယ် မန်ယူနိုက်တက် ချဲလ်ဆီး လီဗာပူး တို့ဟာ လာမည့် ရာသီမှာ အမှတ်ပေးဖလားကို စိန်ခေါ်နိုင်ရန် ပစ်မှတ်ထားနေကြပါတယ်။ မန်စီးတီးဟာ ပြီးခဲ့တဲ့ရာသီက ထိပ်ဆုံးကနေ တောက်လျှောက် ဦးဆောင်နေခဲ့တဲ့ အာဆင်နယ်ကို ကျော်ကာ ပရီးမီးယားလိဂ်ဖလားကို ၃ ကြိမ်ဆက် ဆွတ်ခူးနိုင်ခဲ့ပါတယ်။
မန်ယူနိုက်တက် ကတော့ တန်းဟတ်ရဲ့ ပထမဦးဆုံးရာသီမှာ အဆင့် ၃ နေရာ ရရှိခဲ့ပြီး နယူးကာဆယ်က အဆင့် ၄ နဲ့ ချန်ပီယံလိဂ် ၀င်ခဲ့ပါတယ်။ လီဗာပူး ကတော့ ယူရိုပါလိဂ်သာ ၀င်ခွင့်ရခဲ့ပြီး ချဲလ်ဆီးကတော့ ဥရောပ၀င်ခွင့်နဲ့ လွဲချော်ခဲ့ပါတယ်။ လူတော်တော်များများကတော့ လာမည့်ရာသီမှာ အာဆင်နယ် မန်ယူနိုက်တက် လီဗာပူး နဲ့ ချဲလ်ဆီးတို့ title race မှာ မန်စီးတီးကို ဖိအားကောင်းကောင်း ပေးနိုင်ဖို့ မျှော်လင့်နေကြပါတယ်။
စပါး မန်နေဂျာဟောင်း ရက်နက်ကတော့ ဒန်ကလန်ရိုက်စ်ကို ခေါ်ယူနိုင်တော့မယ့် အာဆင်နယ်ဟာ မန်စီးတီးရဲ့ အဓိကဖလား ပြိုင်ဘက် ထပ်ဖြစ်လိမ့်မယ်လို့ ခန့်မှန်း သွားခဲ့ပါတယ်။
ရက်နက်က “ကျနော် ရိုက်စ်ကို ၀က်ဟမ်း ကနေ ထွက်ခွာသွားတာကို မြင်ရတာ တကယ် ၀မ်းနည်းမိပါတယ်။ ၀က်ဟမ်းဟာ အနည်းဆုံးတော့ နောက်တစ်ရာသီလောက် သူ့ကို ဆက်ထိန်းထားနိုင်ဖို့ ကျနော် မျှော်လင့်နေခဲ့တာပါ။ ဒါပေမယ့် ရိုက်စ်ဟာ အာဆင်နယ်ရဲ့ ပရီးမီးယားလိဂ် မျှော်လင့်ချက်ကို ပိုမို အားကောင်းစေမှာ ကတော့ သေချာပါတယ်။ မန်စီးတီးကို ကျော်ဖြတ်နိုင်ဖို့ ကတော့ လွယ်ကူမှာတော့ မဟုတ်ဘူးပေါ့ဗျာ။
မန်စီးတီးဟာ အမှတ်ပေးဖလား အတွက် ရေပန်းအစားဆုံး အဖြစ် ထပ်ရှိနေအုံးမှာပါ။ ဒါပေမယ့် အာဆင်နယ်ဟာ တကယ်ကောင်းတဲ့ ကစားသမား ခေါ်ယူမှု တစ်ချို့ကို လုပ်ထားနိုင်ခဲ့ပါတယ်။ ကျနော် ကတော့ အာဆင်နယ်တို့ လာမည့် ရာသီ ပိုမို တောင့်တင်းလာလိမ့်မယ်လို့ ထင်ပါတယ်။ ကျနော် ကတော့ အာဆင်နယ် ကသာ မန်စီးတီးရဲ့ အဓိက ဖလား ပြိုင်ဘက်လို့ မြင်နေပါတယ်။” လို့ ဆိုလိုက်ပါတယ်။
