ပရီးမီးယားလိဂ်ပြိုင်ပွဲတွင် ပြီးခဲ့သည့်ရာသီက အခြားလိဂ်များနည်းတူ ကစားသမား (၅)ဦး လူစားလဲခွင့်ရသည့် စည်းမျဉ်းကို ကျင့်သုံးခဲ့သော်လည်း လာမည့် ၂၀၂၀-၂၁ ရာသီတွင် ကစားသမား(၃)ဦးသာ လူစားလဲခွင့်ရသည့် စည်းမျဉ်းကို ပြန်လည်ကျင့်သုံးမည်ဖြစ် ကြောင်း သိရသည်။
ကမ္ဘာ့ဘောလုံးအဖွဲ့ချုပ်(ဖီဖာ)သည် ကိုရိုနာဗိုင်းရပ်စ်ကပ်ဘေးကာလအတွင်း ဘောလုံးပွဲများ ပြန်လည်ယှဉ်ပြိုင်၌ရာ၌ ကစားသမားများ ပွဲပန်းမှုလျော့ပါးစေရန် ကစားသမား(၅)ဦးအထိ လူစားလဲခွင့်ပြုခဲ့ခြင်းဖြစ်ပြီး ယင်းကဲ့သို့ လူစားလဲခြင်းကို ၂၀၂၁ ခုနှစ်၊ ဩဂုတ်လအထိ ခွင့်ပြုပေးသွားမည်ဟုလည်း ကြေညာထားသည်။
သို့သော် ကြာသပတေးနေ့က ပြုလုပ်ခဲ့သော ပရီးမီးယားလိဂ်ကလပ် အသင်းရှယ်ယာရှင်များ အစည်းအဝေး၌ ကစားသမား(၃) ဦးသာ လူစားလဲခွင့်ပြုသည့် စည်းမျဉ်းကို ပြန်လည်ကျင့်သုံးရန် ဆုံးဖြတ်ခဲ့ခြင်းဖြစ်ကြောင်း သိရသည်။
စည်းမျဉ်း ပြန်လည်ပြင်ဆင်ရန်အတွက် မဲခွဲဆုံးဖြတ်ခဲ့ခြင်းဖြစ်ပြီး ပရီးမီးယားလိဂ်အသင်း(၂၀)အနက် (၁၁)သင်းက ကစားသမား (၅)ဦးလူစားလဲမည့် အစီအစဉ်ကို ကန့်ကွက်ခဲ့ခြင်းကြောင့် (၃)ဦးသာ လူစားလဲရန် ဆုံးဖြတ်ခဲ့ခြင်းဖြစ်သည်။
ထို့ပြင် အရန်ကစားသမားစာရင်း၌ ကစားသမား(၇)ဦးသာ ထားရှိရန်လည်း ဆုံးဖြတ်ခဲ့ကြောင်း သိရသည်။
အဆိုပါ ပရီးမီးယားလိဂ်ရှယ်ယာရှင်များအစည်းအဝေးတွင် VAR စနစ်နှင့် ပတ်သက်၍လည်း ပြုပြင်ပြောင်းလဲမှုအချို့ ပြုလုပ်ရန် သဘောတူညီမှု ရရှိခဲ့သည်။
အဓိကအချက်မှာ ဒိုင်လူကြီးများအနေဖြင့် ကွင်းဘေးမှ မော်နီတာကို ပိုမိုကြည့်ရှုရန်ဖြစ်ပြီး သွင်းဂိုးများ၊ အနီကတ်များနှင့် ပယ်နယ်တီပြစ်ဒဏ်များအား ဆုံးဖြတ်ရာတွင် အငြင်းပွားဖွယ်အခြေအနေများ လျော့ကျသွားစေရန် ရည်ရွယ်ခြင်းဖြစ်ကြောင်း သိရသည်။
