ဘာစီလိုနာအသင်းဥက္ကဋ္ဌ ဘာတိုမူက နည်း ပြ ဆယ်တီယန်အနေဖြင့် လာမည့် ၂၀၂၀-၂၁ ရာ သီတွင်လည်း အသင်းနည်းပြအဖြစ် ဆက်ရှိနေမည်ဖြစ်ကြောင်း အတည်ပြုပြောကြားခဲ့သည်။ ထို့ပြင် ဘာတိုမူက ပြီးခဲ့သည့်ဇန်နဝါရီလက ဗယ်လ်ဗာဒီ အား နည်းပြရာထူးမှ ထုတ်ပယ်ခဲ့ခြင်းကိုလည်း နောင်တမရကြောင်း ပြောကြားခဲ့သည်။
အသက် (၅၆)နှစ်အရွယ်ရှိ စပိန်လူမျိုးနည်း ပြ ဗယ်လ်ဗာဒီသည် ၂၀၁၇-၁၈၊ ၂၀၁၈-၁၉ ရာသီ များတွင် ဘာစီလိုနာအသင်းကို (၂)ရာသီဆက် လာလီဂါချန်ပီယံဆုရရှိအောင် စွမ်းဆောင်နိုင်ခဲ့သူ ဖြစ်သည်။ ထို့ပြင် ဗယ်လ်ဗာဒီသည် ယခုရာသီတွင် လည်း ဘာစီလိုနာအသင်းကို လာလီဂါအမှတ်ပေးဇယားတွင် ထိပ်ဆုံး$ရပ်တည်နိုင်အောင် စွမ်းဆောင်ပေးနိုင်ခဲ့သည်။ သို့သော် ဘာစီလိုနာအသင်းသည် ၂၀၂၀ ခုနှစ်၊ ဇန်နဝါရီလ (၁၃)ရက်တွင် ဗယ်လ်ဗာဒီအား ရာထူးမှထုတ်ပယ်ခဲ့ပြီး ဆယ်တီယန်ကို အစားထိုးခန့်အပ်ခဲ့သည်။ ဆယ်တီယန်လက်ထက်တွင် ဘာစီလိုနာအသင်းမှာ ရုန်းကန်နေရပြီး အမှတ်ပေးဇယားထိပ်ဆုံးနေရာကို မဟာပြိုင်ဘက် ရီးယဲလ်အသင်းထံ လွှဲပေးခဲ့ရသည်။
ထို့ပြင် ဘာစီလိုနာကစားသမားများနှင့် နည်းပြ ဆယ်တီယန်တို့အကြား သဘောထားကွဲလွဲမှုများ ဖြစ်ပေါ်နေပြီး ယခုရာသီကုန်တွင် နည်းပြရာထူးမှ ထုတ်ပယ်ခံရဖွယ်ရှိ်နေကြောင်း စပိန်မီဒီယာများက ဖော်ပြနေကြသည်။ သို့သော် ဘာတိုမူက ဆယ်တီ ယန်မှာ လာမည့်ရာသီတွင်လည်း အသင်းနည်းပြ အဖြစ် ဆက်ရှိနေမည်ဖြစ်ပြီး ၎င်း၏စွမ်းဆောင်မှုကို ကျေနပ်ကြောင်း ပြောကြားခဲ့ခြင်းဖြစ်သည်။ ဘာတိုမူက ”လာမယ့်ရာသီမှာလည်း ဘာစီလိုနာအသင်း နည်းပြအဖြစ် ဆယ်တီယန် ဆက်ရှိနေပါလိမ့်မယ်။ ပြီးခဲ့တဲ့ပွဲစဉ်တွေမှာ အသင်းရဲ့တိုးတက်မှုတွေကို ကျွန်တော်တို့ မြင်ခဲ့ရပြီး ဆယ်တီယန်ရဲ့ စွမ်းဆောင်မှုကိုလည်း သဘောကျပါတယ်။ ဗယ်လ်ဗာဒီကို ထုတ်ပယ်ခဲ့တဲ့အတွက် ကျွန်တော် နောင်တမရပါဘူး။ အသင်းက ပြောင်းလဲဖို့ လိုအပ် နေပြီး ဆယ်တီယန်က ဘာစီလိုနာကို ပြောင်းလဲပေးပါလိမ့်မယ်”ဟု ပြောကြားခဲ့သည်။
