မန်ယူအသင်း၏ ပြင်သစ်လက်ရွေးစင်ကွင်းလယ်ကစားသမား ပေါ့ဘာသည် လာမည့်နွေရာသီအပြောင်းအရွှေ့ကာလတွင် စပိန်ထိပ်သီး ရီးယဲလ်မက်ဒရစ်အသင်းသို့ ပြောင်းရွှေ့ကစားလိုသည်ဟု မန်ယူအသင်းတာဝန်ရှိသူများထံ အကြောင်းကြားထားကြောင်း သတင်းများထွက်ပေါ်နေသည်။
အသက် (၂၈)နှစ်အရွယ်ရှိ ပေါ့ဘာသည် ယခုရာသီကုန်တွင် မန်ယူအသင်းနှင့် စာချုပ်သက်တမ်းကုန်ဆုံးမည်ဖြစ်ပြီး အသင်းနှင့် စာချုပ်သက်တမ်းတိုးရန် ဆန္ဒမရှိကြောင်း သိရှိရသည်။
ပေါင်ဒဏ်ရာကြောင့် (၂)လကျော်ကြာ အနားယူနေရသည့် ပေါ့ဘာသည် ပြီးခဲ့သည့်တနင်္လာနေ့က အသင်းနှင့်အတူ ပထမဆုံးအကြိမ် လေ့ကျင့်ခန်းပြန်ဆင်းခဲ့ပြီး ဖေဖော်ဝါရီလအစောပိုင်းတွင် ကစားနိုင်ဖွယ်ရှိနေသည်။
မန်ယူအသင်းတွင် တစ်ပတ်လစာ ပေါင်(၂၉၅၀၀၀)အထိရရှိနေသည့် ပေါ့ဘာသည် လာမည့်နွေရာသီအပြောင်းအရွှေ့စျေးကွက်တွင် ပြောင်းရွှေ့ကြေးအလွတ်ဖြင့် ရီးယဲလ်အသင်းသို့ ပြောင်းရွှေ့ရန် ချိတ်ဆက်လျက်ရှိနေကြောင်း သိရသည်။
Daily Star ၏ ဖော်ပြချက်အရ ပေါ့ဘာသည် ပြီးခဲ့သည့်ရက်သတ္တပတ်ပေါင်းများစွာကတည်းက မန်ယူအသင်းတာဝန်ရှိသူများနှင့်တွေ့ဆုံခဲ့ပြီး သူ့အနေဖြင့် စပိန်သို့ ပြောင်းရွှေ့လိုသည်ဟု ပြောကြားခဲ့ကြောင်း သိရှိရသည်။
မန်ယူအသင်းသည် ယခင်က ပေါ့ဘာကို စာချုပ်သက်တမ်းတိုးရန် ကြိုးစားခဲ့သော်လည်း ယခုအခါ ယင်းအစီအစဉ်ကို လက်လျှော့လိုက်ပြီဖြစ်ပြီး လာမည့်နွေရာသီတွင် ပြောင်းရွှေ့ကြေးအလွတ်ဖြင့် ထွက်ခွာခွင့်ပေးဖွယ် ရှိနေကြောင်းလည်း Daily Star က ဖော်ပြခဲ့သည်။
မန်ယူအသင်းနည်းပြ ရန်းနစ်ကမူ ပေါ့ဘာအနေဖြင့် ရာသီကုန်တွင် အသင်းမှထွက်ခွာသည်ဖြစ်စေ၊ အသင်းတွင်ဆက်ရှိနေသည်ဖြစ်စေ လက်ကျန်ပွဲများတွင် ၎င်းကိုအသုံးပြုသွားမည်ဖြစ်ကြောင်း ပြောကြားခဲ့သည်။
ရန်းနစ်က ”ကျွန်တော့်ရဲ့ စာချုပ်သက်တမ်းကလည်း အခုရာသီကုန်မှာ ကုန်ဆုံးမှာပါ။ ဒါကြောင့် ကျွန်တော့်အတွက်တော့ ကစားသမားရဲ့ စာချုပ်သက်တမ်းက အရေးမပါဘူး။ အရေးကြီးတာက ကစားသမားအနေနဲ့ လက်ရှိအသင်းမှာ ပါဝင်ချင်သလားဆိုတာပါပဲ။ ပေါ့ဘာက မန်ယူပရိသတ်တွေကို သ
ဟာ ဘယ်လိုကစားသမားလဲဆိုတာကို သက်သေပြချင်နေတယ်။ ဒီလိုကစားသမားမျိုးကို ကျွန်တော် ဘာလို့မသုံးရမှာလဲ”ဟု ပြောကြားခဲ့သည်။
ပေါ့ဘာသည် မန်ယူအသင်းအတွက် ယခုရာသီ ပြိုင်ပွဲစုံ (၁၃)ပွဲသာ ပါဝင်ထားရသေးပြီး ဂိုးသွင်းယူနိုင်ခြင်းမရှိသေးပေ။
