ဟယ်ရီမက်ဂွါရီက လက်ရှိ ယူနိုက်တက်အသင်းရဲ့ အဆိုးရွားဆုံးရာသီအစရလဒ်တွေအပေါ် တာဝန်ယူကြဖို့ အသင်းဖော်တွေကို တိုက်တွန်းသွားခဲ့ပါတယ်။
အင်္ဂလန်သားဟာ ကြာသပတေးည ပေါ်တိုနဲ့ သုံးဂိုးစီ သရေကျခဲ့တဲ့ပွဲစဉ်အတွင်း အသင်းအတွက် အဖိုးတန်ချေပဂိုးကို နာကျင်အချိန်ပိုမှာ သွင်းယူပေးခဲ့ပါတယ်။
ယူနိုက်တက်ဟာ ပရီးမီးယားလိဂ်မှာလည်း အခြေအနေဆိုးရွားနေပြီး တော့တင်ဟမ်ကို ဂိုးပြတ်ရှုံးပြီးနောက် တန်းဆင်းဇုန်နဲ့ လေးမှတ်သာကွာတဲ့ အခြေအနေဖြစ်နေခဲ့ပါတယ်။
ယခုအချိန်မှာတော့ မက်ဂွါရီက လက်ရှိရလဒ်ဆိုးရွားမှုတွေအတွက် နည်းပြတန်ဟတ်အပေါ် ပြစ်တင်ဝေဖန်တာထက် ကစားသမားတွေအနေနဲ့ တာဝန်ယူသင့်ကြောင်း ပြောခဲ့ပါတယ်။
မက်ဂွါရီက “ရလဒ်တွေက လုံလောက်ခြင်းမရှိဘူးဆိုတာ အသိသာကြီးပါ။ ဘောလုံးသမားတစ်ယောက်အနေနဲ့ ဘေးကိုကြည့်ပြီး အခြားသူတစ်ယောက်၊ ဒါမှမဟုတ် အသင်းဖော်၊ ဝန်ထမ်း၊ နည်းစနစ်ပိုင်းကို ဝေဖန်တာမျိုးက လွယ်ပါတယ်။ တကယ်က ကိုယ့်ကိုယ်ကိုယ်ပဲ ကြည့်ရမှာပါ။
ကျွန်တော်တို့က ကွင်းထဲမှာ တကယ်ဝင်ကစားသူတွေပါ။ ခံစစ်ကစားရသူတွေက ကျွန်တော်တို့ပါ။ ဒါကြောင့် ကျွန်တော်တို့ပဲ တာဝန်ယူသင့်ပြီး အားလုံးက ဒီလိုအခိုက်အတန့်တွေမှာ ပိုကောင်းအောင် လုပ်ခဲ့သင့်ပါတယ်။
ကျွန်တော်တို့ ဖိအားအောက်ရောက်နေချိန်မှာ ဂိုးတွေပေးနေရတာကို ပြီးခဲ့တဲ့တစ်နှစ်ကျော်ကတည်းက မြင်တွေ့ခဲ့ရပြီးပါပြီ။ အဲ့ဒါမျိုးက မဖြစ်သင့်ပါဘူး။
ကျွန်တော်တို့ ဖိအားဒဏ်ကို ခံနိုင်ရပါမယ်။ အသင်းသားတွေကြားမှာ ယုံကြည်မှုပိုရှိရပါမယ်။ ကျွန်တော်တို့ ဧရိယာထဲ ခံစစ်ကစားချိန်မှာ ကစားအားက ဒီထက်ပိုတက်လာသင့်ပါတယ်။”လို့ ပြောခဲ့ပါတယ်။
