ဒီနှစ် ဘောလုံးရာသီကတော့ ပွဲစဉ်တွေ ဆက်တိုက် ကစားပေးနေရတာ ၊ ဗိုင်းရပ် ကူးစက်မှုနှုန်းက လျှော့ကျသွားခြင်း မရှိပဲ ဖြစ်နေတာတွေ နဲ့ပဲ ထိပ်သီးဘောလုံး အသင်းတွေဟာ အဲဒီဒဏ်တွေကို အပြင်းအထန် ခံစားရလျှက် ရှိနေပါတယ်။
နိုင်ငံတကာ ပွဲစဉ်တွေကြောင့် ဘောလုံးသမားတွေ အကြား ဗိုင်းရပ် ကူူးစက်မှုနှုန်းက ဆက်တိုက် မြင့်မားနေသလို ၊ ကစားသမားတွေ အကြား ဒဏ်ရာပြသနာတွေ ကလဲ မကြာခဏဆိုသလို တွေ့နေရပါတယ်။
2020-2021 ဘောလုံးရာသီ စတင်တာ 2 လ ကျော်သာရှိနေသေးပေမယ့် ၊ ပရီးမီးယားလိဂ် ချန်ပီယံ လီဗာပူး အသင်းဟာ ဒဏ်ရာပြသနာပေါင်း 18 ခု အထိတောင် ရင်ဆိုင်နေရပြီ ဖြစ်ပါတယ်။
နိုင်ငံတကာ ပွဲစဉ်တွေ မကစားမီ နောက်ခံ ကစားသမားတွေ ဖြစ်တဲ့ အာနိုး နဲ့ ဂိုးမက်ဇ် တို့ ဒဏ်ရာ ပြသနာ အသီးသီးရရှိခဲ့ကြသလို ၊ အီဂျစ် ကို ပြန်လည်ရောက်ရှိနေတဲ့ မိုဆာလတ် ဟာလဲ ဗိုင်းရပ်ပိုး ကူးစက်ခံခဲ့ရပါတယ်။
သို့သော် အဆိုးထဲက သတင်းကောင်း တစ်ခုက ဒဏ်ရာပြသနာတွေ နဲ့ ရုန်းကန်နေရတယ် လို့ သတင်းကြီးခဲ့တဲ့ ရော်ဘတ်ဆန် နဲ့ ဟန်ဒါဆန် တို့ဟာ ဒီတစ်ပတ်မှာ ကစားမယ့် လက်စတာ နဲ့ ပွဲမှာ ပါဝင် ကစားပေးနိုင်ဖွယ် ရှိနေတယ်လို့ သိရပါတယ်။
ဟန်ဒါဆန် ဟာ ဘယ်လ်ဂျီယံ အသင်းကို အဝေးကွင်းမှာ ရှုံးနိမ့်ခဲ့တဲ့ အင်္ဂလန် ပွဲစဉ်မှာ ပါဝင် ကစားပေးခဲ့ပြီး ၊ ပထမပိုင်း အပြီးမှာ ဒဏ်ရာ ရရှိခဲ့တာကြောင့် လူစားလဲ ခံခဲ့ရပါတယ်။ နည်းပြ ဆောက်ဂိတ် ကိုယ်တိုင်လဲ ဟန်ဒါဆန် ဟာ ဒဏ်ရာရရှိသွားတာ ဖြစ်တဲ့ အကြောင်း ပွဲအပြီး သတင်းစာရှင်းလင်းပွဲမှာ အတည်ပြု ပြောဆိုခဲ့ ပါတယ်။
လက်ရှိ အချိန်မှာတော့ ဟန်ဒါဆန် ဟာ အင်္ဂလန် လက်ရွေးစင် အသင်းကနေ နှုတ်ထွက်လိုက်ပြီ ဖြစ်ပြီး ၊ ကလပ်အသင်းဆီ ပြန်လာခဲ့ပြီ ဖြစ်ပါတယ်။ သူ့ရဲ့ ဒဏ်ရာကို ဒီကနေ့မှာ ဆက်လက် စစ်ဆေးမှုတွေ ပြုလုပ်သွားမှာပါ။
Mirror သတင်းစာ ကတေ့ာ သူ့ရဲ့ ဒဏ်ရာဟာ သိပ်ပြီး ပြင်းထန်ခြင်း မရှိတာကြောင့် လက်စတာ နဲ့ ပွဲမှာတောင် ပါဝင် ကစားပေးနိုင်ဖွယ် ရှိနေတယ်လို့ အခိုင်အမာ ရေးသားလိုက်ပါတယ်။
လီဗာပူး ပရိသတ်တွေ အကြား နောက်ထပ် စိုးရိမ်နေတဲ့ ဒဏ်ရာသတင်းက ရော်ဘတ်ဆန် ရဲ့ အခြေအနေပါ။ ဆားဘီးယား နဲ့ ကစားခဲ့တဲ့ ပွဲအပြီးမှာ တံကောက်ကြော ဒဏ်ရာ အနည်းငယ် ရရှိနေတဲ့ အကြောင်း သူကိုယ်တိုင် ထုတ်ဖော်ပြောဆိုခဲ့တာ ဖြစ်ပါတယ်။
သို့သော် စကော့တလန် အသင်းခေါင်းဆောင် ရဲ့ အနေအထား ကလဲ စိုးရိမ်စရာ မရှိဘူးလို့ ယူဆရပါတယ်။
တကယ်လို့သာ ဒဏ်ရာ ပြသနာသာ ပြင်းထန်ခဲ့ရင် ၊ လက်ရွေးစင် အသင်းကနေ ချက်ခြင်း နှုတ်ထွက်ပြီး ကလပ်အသင်းဆီ ပြန်လာမှာ ဖြစ်ပေမယ့် ၊ တကယ့် လက်တွေ့မှာတော့ အနားယူခြင်း မရှိတဲ့ အပြင် ၊ အစ္စရေး ခရီးစဉ် ကိုပါ အသင်းနဲ့ အတူ လိုက်ပါသွားခဲ့ ပါတယ်။
စကော့တလန် သတင်းတွေ ကတော့ ရော်ဘတ်ဆန် ဟာ လက်စတာ ပွဲအထိတောင် စောင့်ဆိုင်းစရာ မလိုပဲ ၊ အစ္စရေး နဲ့ ပွဲမှာတောင် အသင်းအတွက် မီးနစ် အနည်းငယ် ကစားပေးနိုင်ဖွယ် ရှိနေတယ်လို့တောင် ထုတ်ဖော် ရေးသားနေကြပါတယ်။
ဒါကြောင့် လီဗာပူး ပရိသတ်တွေ အနေနဲ့ အဆိုပါ ကစားသမား နှစ်ယောက် နဲ့ ပတ်သက်တဲ့ ဒဏ်ရာသတင်းတွေကို သိပ်ပြီး စိုးရိမ်စရာ မလိုတော့ဘူးလို့ ပြောရတော့မှာပါ။
ဒါ့အပြင် လက်စတာ နဲ့ ပွဲဟာ တနင်္ဂနွေနေ့ ညဉ့်နက်ပိုင်းမှ ကစားရမှာ ဖြစ်တာကြောင့် ၊ ပြင်ဆင်ချိန်တွေ အများကြီး ရှိနေပြန်ပါသေးတယ်။
လက်စတာ ဟာ လက်ရှိ အမှတ်ပေးဇယား ရဲ့ ထိပ်ဆုံးမှာ ရပ်တည်နေပြီး ၊ လီဗာပူး ကတော့ တစ်မှတ် အကွာ နဲ့ တတိယ နေရာမှာ ရှိနေပါတယ်။
လီဗာပူးဟာ အခုလို အကျပ်အတည်း ကာလမျိုးတွေ ဆိုရင် လက်စတာ နဲ့ အမြဲတမ်း ထိပ်တိုက်တွေ့ဆုံနေကြ ဖြစ်ပါတယ်။ မနှစ်က ဆိုရင်လဲ ကမ္ဘာ့ချန်ပီယံများ ဖလားကနေ ရောက်ရောက်ခြင်းမှာပဲ လက်စတာကွင်းကို သွားရောက် ကစားခဲ့ရဖူးပြီး ၊ ဂိုးပြတ် နိုင်ပွဲနဲ့ အောင်ပွဲ ခံထားခဲ့ပါတယ်။
