လက်စတာအသင်းနှင့် ကစားခဲ့သည့်ပွဲတွင် ကစားသမားအချို့၏ခံယူချက်ပိုင်းကို မိမိသဘောမကျဟု စပါးနည်းပြ မော်ရင်ဟို ဝေဖန်

စပါးအသင်း၏နည်းပြဖြစ်သူ မော်ရင်ဟိုက လက်စတာအသင်းကို ရှုံးနိမ့်ခဲ့သည့်ပွဲတွင် အသင်းမှ ကစားသမားအချို့၏ ခံယူချက်ပိုင်းကို မိမိသဘောမကျကြောင်း ဝေဖန်ပြောဆို ခဲ့သည်။

မော်ရင်ဟိုက ညာနောက်ခံလူ အော်ရီယေးကြောင့် ပေးလိုက်ရသည့် ပယ်နယ်တီတွင် အော်ရီယေးက မလုပ်သင့်သည့်အလုပ်ကို လုပ်ခဲ့သည်ဟုဆိုခဲ့ပြီး၊ မိမိတို့ ဦးဆောင်ဂိုးရနိုင် သည့်အခြေအနေတွင် ဂိုးပြန်ပေးခဲ့ရသည်ဟုလည်း ဆိုခဲ့သည်။

မော်ရင်ဟိုက ”ကျွန်တော်တို့ရဲ့ပွဲအစခြေစွမ်းက မကောင်းပါဘူး။ တစ်ဦးချင်းအနေနဲ့ ပြောလို့ရပေမဲ့ ကျွန်တော် မပြောချင်ဘူး။ ဒါပေမဲ့ ပထမပိုင်းမှာ ကျွန်တော်တို့ အကောင်းဆုံးကစားတဲ့အချိန်မှာ ဂိုးပေးလိုက်ရတယ်။ ဒီအချိန်မှာ ကစားပုံကောင်းပြီး ဦးဆောင်ဂိုးရနိုင်တဲ့ အခြေအနေတွေရှိခဲ့ပေမဲ့ ပယ်နယ်တီ ပေးခဲ့ရတာဖြစ်တယ်။ ဒုတိယပိုင်းမှာ လည်း ကျွန်တော်တို့က ပွဲကို စိုးမိုးလာပြီး၊ ထိန်းချုပ်နိုင်ပြီဆိုတဲ့အချိန်မှာ ကိုယ့်ဂိုးကိုယ်သွင်းမိခဲ့တယ်။ ကျွန်တော်တို့အသင်းရဲ့ခြေစွမ်းက မကောင်းပါဘူး။ ဒါပေမဲ့ ဒီပွဲကို နိုင်သင့်တယ်၊ သို့မဟုတ် ရှုံးသင့်တယ်လို့လည်း ကျွန်တော် မထင်ဘူး။ နှစ်သင်းစလုံးက ပုံစံကောင်း ပြနိုင်တယ်လို့လည်း ကျွန်တော် မထင်ပါဘူး။ အော်ရီယေးက ဒီ ဖျက်ထုတ်မှုကို လုပ်ဖို့မလိုဘဲ လုပ်ခဲ့တယ်။ ဒါပေမဲ့ ဒီအတွက်တော့ သူ့ကို ကျွန်တော် အပြစ်ပေးမှာမဟုတ်ပါဘူး။ ဒီပွဲက ထူးဆန်းပါတယ်။ ပယ်နယ်တီ တစ်ဂိုး၊ Own Goal တစ်ဂိုးနဲ့ ရှုံးခဲ့တယ်။ ကစားပုံက မကောင်းဘူး။ ဒါပေမဲ့ ကျွန်တော်တို့ဂိုးသမားဟာ ခက်ခက်ခဲခဲကာကွယ်မှုလည်း မလုပ်ခဲ့ရဘူး။ ကစားသမားတချို့ရဲ့ခံယူချက်ကိုလည်း သဘောမကျပါဘူး”ဟု ဆိုခဲ့ သည်။