လီဗာပူး တိုက်စစ်မှုး မိုဟာမက်ဆာလား အနေနဲ့ ကိုရိုနာဗိုင်းရပ်စ် ကင်းရှင်း သွားခဲ့ပြီ ဆိုရင်တောင် လာမည့် တနင်္ဂနွေနေ့ ပရီးမီးယားလိဂ် ဇယားထိပ်မှာ ဦးဆောင်နေတဲ့ လက်စတာစီးတိးကို အန်ဖီးမှာ လက်ခံ ယှဥ်ပြိုင်ကစား သွားရမယ့် ပွဲစဥ်ကို လွဲချော်ဖို့ သေချာသလောက် ဖြစ်နေပါတယ်။ ဆာလားဟာ အီဂျစ် အသင်းနဲ့ အတူ နိုင်ငံတကာ ပွဲစဥ်တွေ အတွက် သွားရောက် ပူးပေါင်းနေစဥ် ကိုရိုနာဗိုင်းရပ်စ် ကူးစက်ခံခဲ့ရတာ ဖြစ်ပြီး ရောဂါလက္ခဏာ မပြသ ခဲ့ပေမယ့်လည်း ပြီးခဲ့တဲ့ သောကြာနေ့က isolation လုပ်ခဲ့ရပါတယ်။
ဒါပေမယ့်လည်း အီဂျစ်အက်ဖ်အေက သူတို့ရဲ့ ကြယ်ပွင့် ကစားသမားကို လာမည့် ကြာသာပတေးနေ့မှာ တတိယအကြိမ်မြောက် ကိုဗစ် test စစ်ဆေး သွားမယ်လို့ ဆိုထားပြီး အကယ်၌ Negative ပြသခဲ့မယ် ဆိုရင် ဆာလားကို မာဆေးဆိုက်ကို ပြန်ခွင့်ပြုသွားမယ်လို့ ထုတ်ပြန် ထားခဲ့ပါတယ်။
ဒါ့ကြောင့်လည်း အကယ်၌ ဆာလားသာ ကြာသာပတေးနေ့မှာ Negative ပြခဲ့မယ် ဆိုရင် လက်စတာနဲ့ ပွဲစဥ်မှာ ဝင်ရောက် ကစားနိုင်လောက်တယ် ဆိုတဲ့ မျှော်လင့်ချက်တွေ မြင့်တက်လာခဲ့ပေမယ့် ပရီးမီးယားလိဂ်က ချမှတ်ထားတဲ့ စည်းမျဥ်း အရ ကိုဗစ် ၁၉ positive ဖြစ်ခဲ့တဲ့ ဘယ်ကစားသမား မဆို ခြွင်းချက်မရှိ အနည်းဆုံး self-isolate ၁၀ ရက် လုပ်သွား ရမယ်လို့ သိရပါတယ်။
ဒါ့ကြောင့် ဆာလား အနေနဲ့ လီဗာပူးကို ပြန်လာတဲ့ အချိန် ပရီးမီးယားလိဂ်ရဲ့ အစီအစဥ်သစ် အရ လေဆိပ်မှာ ကိုဗစ် test စစ်ဆေးတဲ့ အခါ ကိုရိုနာဗိုင်းရပ်စ် ကင်းရှင်းတယ် ဆိုတဲ့ အဖြေ ထပ်ထွက် ခဲ့မယ်ဆိုရင်တောင် ၎င်းကို ဘောလုံး ပြန်လည် ကစားခွင့် မပြုမီ ၁၀ ရက်တာ isolation period ကို ပြည့်မြောက်အောင် လုပ်သွားရမှာ ဖြစ်ပါတယ်။ ဒါ့ကြောင့် ဆာလားဟာ လာမည့်တစ်ပတ် တနင်္လာနေ့ထိ self-isolation လုပ်နေရအုံးမှာ ဖြစ်ပါတယ်။
ဒါ့အပြင် ဆာလားဟာ အစိုးရ တာဝန်ရှိသူတွေကို သူဟာ intentional football travel corridor အဖြစ် ရှိနေကြောင်းကို အထောက်အထား ပြသရမှာ ဖြစ်ပြီး ဒါမှသာ ယူကေ ကို နိုင်ငံခြား ကနေ ပြန်လာတဲ့ သူတိုင်း ၁၄ ရက် self-isolate လုပ်သွားရမယ် ဆိုတဲ့ စည်းမျဥ်းနဲ့ ကင်းလွတ် နိုင်မှာ ဖြစ်ပါတယ်။
နိုင်ငံ့လက်ရွေးစင် အသင်း အတွက် နိုင်ငံရပ်ခြားမှာ သွားရောက် ကစားပြီး ပြန်လာတဲ့ ကစားသမားတွေ အနေနဲ့ လက်ရွေးစင် အသင်းနဲ့ အတူ closed bubble မှာ ရှိနေခဲ့မယ်ဆိုရင် ဒီစည်မျဥ်းရဲ့ ခြွင်းချက်ထဲမှာ ပါဝင်မှာ ဖြစ်ပြီး ဆာလားဟာ အီဂျစ်အသင်းနဲ့ အတူ မပူးပေါင်းခင် မှာတော့ သူ့အကိုရဲ့ မင်္ဂလာဆောင်ကို တက်ရောက် ခဲ့တာတော့ ရှိခဲ့ပါတယ်။ လီဗာပူး အနေနဲ့ ဒီကိစ္စကို တာဝန်ရှိသူတွေ လက်ခံအောင် ရှင်းလင်းသွားဖို့ လိုအပ်ပြီး ဆာလား အနေနဲ့ လေဆိပ်မှာ စစ်ဆေးတဲ့ အခါ Negative ပြခဲ့မယ်ဆိုရင် တနင်္လာနေ့မှာ လေ့ကျင်ခန်း ပြန်ဆင်းနိုင်ဖို့ မျှော်လင့်ရပါတယ်။
ဒီလိုသာ ဆိုရင်တော့ ဆာလား အနေနဲ့ လာမည့်တစ်ပတ် ဗုဒ္ဓဟူးနေ့ အတ္တလန်တာနဲ့ ချန်ပီယံလိဂ် ပွဲစဥ်မှာ လီဗာပူး အတွက် ပြန်ကစား ပေးနိုင်ဖို့ အခြေအနေ ရှိသွားမှာ ဖြစ်ပါတယ်။ ဘာပဲဖြစ်ဖြစ် လက်စတာနဲ့ ကစားရမယ့် ပရီးမီးယားလိဂ် အရေးကြီးပွဲစဥ်ကို ဆာလားသာ လွဲချော်ခဲ့မယ် ဆိုရင် ဒါဟာ အဓိက ကစားသမား တော်တော်များများ ဒဏ်ရာပြဿနာတွေ ရင်ဆိုင် နေရတဲ့ လီဗာပူး အတွက် နောက်ထပ် ကြီးမားတဲ့ ဆုံးရှုံးမှု တစ်ခု ဆိုတာ အသေအချာ ပါပဲ။
ပထမဦးစားပေး နောက်ခံလူတွေ ဖြစ်ကြတဲ့ ဗာဂျယ်ဗန်ဒိုက် နဲ့ ဂိုးမက်ဇ် တို့ဟာ ပြင်းထန်တဲ့ ဒူးဒဏ်ရာတွေကြောင့် ဒီရာသီရဲ့ ကာလအများစုကို လွဲချော် သွားတော့မှာ ဖြစ်ပြီး အလက်ဇန်းဒါးအာနိုး ကလည်း မန်စီးတီးနဲ့ ပွဲမှာ ရရှိခဲ့တဲ့ ကြွက်သား ဒဏ်ရာကြောင့် တစ်လနီးပါး အနားယူ ရမှာ ဖြစ်ပါတယ်။
ဟန်ဒါဆန် နဲ့ ရောဘတ်ဆန် တို့ရဲ့ ကြံ့ခိုင်မှု အခြေအနေ ကလည်း လက်စတာနဲ့ ပွဲစဥ်အမှီ ပြန်လည် ပါဝင်လာဖို့ အတွက် သံသယ ဖြစ်စရာ အနေအထားမှာ ရှိနေပါတယ်။ ဒါပေမယ့် ဒူးကောက်ကြော ဒဏ်ရာ ရခဲ့တဲ့ ဖာဘင်ညို နဲ့ ပြီးခဲ့တဲ့ လက ဒူးဒဏ်ရာ ရခဲ့တဲ့ တီယာဂိုအယ်ကန်တာရာ တို့ကတော့ လက်စတာနဲ့ ပွဲမှာ ပြန်လည် ပါဝင်လာဖို့ ရှိနေပါတယ်။
