မန်စီးတီးအသင်း၏ နည်းပြဖြစ်သူ ဂွါဒီယိုလာက လက်စတာအသင်းနှင့် ပွဲစဉ်တွင် အိမ်ကွင်း၌ ဂိုးပြတ်ရှုံးနိမ့်ခဲ့ခြင်းအတွက် စိတ်ပျက်မိသော်လည်း (၂)ပွဲသာ ကစားရသေးသဖြင့် ချန်ပီယံဆုအတွက် စိုးရိမ်စိတ်မရှိကြောင်း ပြောကြားခဲ့သည်။
အိမ်ကွင်းတွင် ရှုံးနိမ့်ခဲ့ပြီး (၂)ပွဲသာကစားပြီးချိန်တွင် အမှတ်လျော့ခြင်းအပေါ် မေးခွန်းထုတ်ခဲ့ခြင်းအား ဂွါဒီယိုလာက (၂)ပွဲသာ ကစားပြီးချိန်ကို ပြန်လည်ဦးတည်ကာ ချန်ပီယံဆုအတွက် စိုးရိမ်စိတ်မရှိကြောင်း ပြောကြားခဲ့ခြင်းဖြစ်သည်။
ဂွါဒီယိုလာက “စိတ်ပျက်စရာကောင်းတဲ့ ရှုံးပွဲတစ်ပွဲဆိုတာကို ကျွန်တော် လက်ခံပါတယ်။ ဒါပေမဲ့ အခုမှ ဒုတိယပွဲပဲ ရှိသေးပါတယ်။ ရာသီရှည်ပြိုင်ပွဲအတွက် စိုးရိမ်စိတ်မရှိပါဘူး” ဟု ပြောကြားခဲ့ခြင်းဖြစ်သည်။
ယင်းပွဲတွင် မန်စီးတီးအသင်းသည် ဦးဆောင်ဂိုးရပြီးနောက်ဂိုးများ ဆက်တိုက်ပြန်ပေးခဲ့ရပြီး ပွဲအပြီးတွင် (၂-၅)ဂိုးဖြင့် ရှုံးနိမ့်ခဲ့ခြင်းဖြစ်သည်။
(၅)ဂိုးအထိ အသွင်းခံရခြင်းနှင့် ပတ်သက်ပြီး အသင်းသားများအပေါ် မည်ကဲ့သို့ မှတ်ချက်ပေးလိုသနည်းဆိုသည့် မေးခွန်းကိုလည်း ဂွါဒီယိုလာက “သူတို့က ဘယ်လောက်ကောင်းသလဲ၊ အသင်းတစ်သင်းအနေနဲ့ ဘယ်လောက်ကောင်းသလဲ၊ သူတို့ဟာ ဘယ်လိုကစားသမားတွေလဲ။ ပြီးတော့ ဒီလိုရှုံးပွဲမျိုးက ဘယ်လောက် နာကျင်သလဲဆိုတာကို သူတို့အတိအကျသိပါတယ်။ ဒါပေမဲ့ သူတို့က ဒီနေရာမှာ ရပ်နေမယ့်သူတွေ မဟုတ်ပါဘူး။ ကျွန်တော်တို့အားလုံးက ဒီနေရာကနေ ပြန်လည်စတင်မယ့်သူတွေဖြစ် ပါတယ်။ အိမ်ကွင်းမှာ (၂-၅)ဂိုးနဲ့ ရှုံးတယ်ဆိုတာ လက်ခံဖို့ ခက်ခဲတာအမှန်ပါပဲ။ ဒါပေမဲ့ ကျွန်တော်တို့ ဒါကို လက်ခံရမှာဖြစ်ပြီး ပြန်လည်စတင်မှာပါ” ဟု ပြောကြားခဲ့သည်။
