ဘာစီလိုနာအသင်းနည်းပြသစ် ရော်နယ်လ်ကိုးမန်းခေါ်ယူလိုသည့် ကစားသမားသစ် (၄)ဦးစာရင်းတွင် ဒီပိုင်း၊ ဝိုင်နယ်လ်ဒမ်း၊ ဒီဗရိုင်းစသည့် နယ်သာလန်လက်ရွေးစင်ကစားသမား(၃)ဦးအထိ ပါဝင်နေကြောင်း သိရသည်။
နယ်သာလန်လက်ရွေးစင်နည်းပြအဖြစ်မှ ဘာစီလိုနာအသင်းနည်းပြအဖြစ် (၂)နှစ်စာချုပ်ဖြင့် ခန့်အပ်ခံထားရသူ ရော်နယ်လ်ကိုးမန်းသည် ကစားသမားသစ်လေးဦးခေါ်ယူပေးရန် တောင်းဆိုထားပြီး ၎င်းတို့မှာ လိုင်ယွန်အသင်း တိုက်စစ်ကစားသမား ဒီပိုင်း၊ လီဗာပူးလ်အသင်းကွင်းလယ်လူ ဝိုင်နယ်လ်ဒမ်း၊ အင်တာမီလန်အသင်းနောက်ခံလူ ဒီဗရိုင်းနှင့် မန်စီးတီးအသင်းနောက်ခံလူ အဲရစ်ဂါစီယာ တို့ဖြစ်ကြောင်း စပိန်နိုင်ငံထုတ် Marca သတင်းစာက ဖော်ပြသည်။
၎င်းတို့(၄)ဦး အနက် ဒီပိုင်း၊ ဝိုင်နယ်လ်ဒမ်းနှင့် အဲရစ်ဂါစီယာတို့ (၃)ဦးမှာ သက်ဆိုင်ရာကလပ်များနှင့် စာချုပ်တစ်နှစ်သာကျန်ရှိတော့သဖြင့် သက်သာသည့်ပြောင်းရွှေ့ကြေးဖြင့် ခေါ်ယူနိုင်ဖွယ်ရှိပြီး ဒီဗရိုင်း၏စာချုပ်မှာမူ ၂၀၂၃ ခုနှစ်အထိ ကျန်ရှိနေသေးသည်။
ဘာစီလိုနာအကယ်ဒမီကစားသမားဟောင်း အဲရစ်ဂါစီယာမှာလည်း မန်စီးတီးအသင်းနှင့် သက်တမ်းတိုးရန် ငြင်းဆန်ထားကြောင်း နည်းပြ ဂွါဒီယိုလာက ဝန်ခံပြောကြားထားပြီး ယခုနွေရာသီတွင် ရောင်းချဖွယ်ရှိသည်။
ဘာစီလိုနာအသင်းသည် ယခုနွေရာသီတွင် ကွင်းလယ်လူ အာသာနှင့် ရာကီတစ်တို့ကို ရောင်းချထားပြီး စီနီယာကစားသမားအဖြစ် ဂျူဗင်တပ်စ်ကွင်းလယ်လူ ယာနစ်တစ်ဦးတည်းသာ ပြန်လည်ခေါ်ယူထားသည်။
