မနေ့ညက ဘိုင်ယန်ကို ၂-၀ နဲ့ရှုံးအပြီးမှာတော့ မက်ဆီ ဘာပေနဲ့ ပီအက်စ်ဂျီတို့တော့ ချန်ပီယံလိဂ်ပြိုင်ပွဲက ထွက်ခဲ့ရပြီဖြစ်ပါတယ်။
မက်ဆီနဲ့ ပီအက်စ်ဂျီတို့ အခုလိုပြိုင်ပွဲကထွက်လိုက်ရခြင်းဟာ ရော်နယ်ဒိုအတွက် ပျော်စရာ တစ်ခုဖြစ်လာနိုင်ကြောင်း ဗြိတိန်မီဒီယာတစ်ခုက ရေးသားဖော်ပြလိုက်ပါတယ်။ ရော်နယ်ဒိုက ချန်ပီယံလိဂ်မှာ စုစုပေါင်းဂိုး ၁၄၀ သွင်းပြီး ပြိုင်ပွဲသမိုင်းတစ်လျှောက်ဂိုးအများဆုံး သွင်းသူ အဖြစ် ရပ်တည်နေပါတယ်။ ရော်နယ်ဒိုအနေနဲ့ ဆော်ဒီကလပ်အသင်း အယ်လ်နက်ဆာကို ပြောင်းရွှေ့လိုက်ပြီ ဖြစ်တာကြောင့် ချန်ပီယံလိဂ်သွင်းဂိုးထပ်ရဖို့က မဖြစ်နိုင်တော့ပါဘူး။ ဒါပေမယ့်သူက လက်ရှိအချိန်အထိ ချန်ပီယံလိဂ်သွင်းဂိုးအများဆုံး ကစားသမားဆိုတဲ့ သမိုင်းမှတ်တမ်းကိုတော့ ရယူထားနိုင်ဆဲပါ။
မက်ဆီရဲ့ ချန်ပီယံလိဂ်သွင်းဂိုးအရေအတွက်က စုစုပေါင်း ၁၂၉ ဂိုးရှိနေပါပြီ။ မက်ဆီတို့အသင်းက ဘိုင်ယန်ကို ကျော်ဖြတ်နိုင်ခဲ့ရင် အာဂျင်တိုင်းတိုက်စစ်မှူးက နောက်ထပ် ချန်ပီယံလိဂ်သွင်းဂိုးတွေ ထပ်ရနိုင်ပါတယ်။ အခုတော့ ဒီနှစ်ဘောလုံးရာသီမှာ ချန်ပီယံလိဂ်သွင်းဂိုးထပ်ရဖို့ မရှိတော့ဘူးပေါ့။
မက်ဆီအနေနဲ့ ပီအက်စ်ဂျီနဲ့ လာမယ့် ဘောလုံးရာသီမှာ ဘယ်အသင်းမှာ ကစားဖြစ်မယ် မသေချာသေးပါဘူး။ ပီအက်စ်ဂျီနဲ့ စာချုပ်သက်တမ်းမတိုးရသေးသလို ဘာစီလိုနာကို ပြန်ဖို့ဆိုတာလည်း အလှမ်းဝေးနေပါတယ်။ အမေရိကန်ကလပ် အယ်လ်အေဂယ်လက်ဆီကလည်း မက်ဆီကို ခေါ်ချင်နေပါတယ်။ တကယ်လို့ ဥရောပပြိုင်ပွဲတွေကို မက်ဆီက စွန့်ခွာမယ်လို့ ဆုံးဖြတ်ရင် ရော်နယ်ဒိုက ချန်ပီယံလိဂ် ဂိုးအများဆုံးသွင်းသူစံချိန်ကို ဆက်ထိန်းသွားနိုင်ဖို့ ပိုပြီးနီးစပ်လာမှာ ဖြစ်ကြောင်းပါ။
