၎င်းအနေဖြင့် ရီးယဲလ်အသင်းနှင့်ကစားမည့် ချန်ပီယံလိဂ် ဒုတိယအကျော့ပွဲကို လွဲချော်မည် ဖြစ်ကြောင်း ဂွါဒီယိုလာက ပြောကြားဖူးသော်လည်း ယခုအခါ အခြေအနေတိုးတက်လာခြင်းဖြစ်သည်။
ဒူးဒဏ်ရာကြောင့် အနားယူနေရသည့် တိုက်စစ်မှူး အဂွဲရိုးအနေဖြင့် ရီးယဲလ်အသင်း နှင့် ချန်ပီယံလိဂ်ပွဲတွင် ပြန်လည်ပါဝင်နိုင်ဖွယ် ရှိကြောင်း မန်စီးတီးအသင်းနည်းပြ ဂွါဒီယို လာက အရိပ်အမြွက်ပြောကြားခဲ့သည်။
အဂွဲရိုးသည် ဝဲဘက်ဒူးဒဏ်ရာခွဲစိတ် ကုသမှုကြောင့် ဇွန်လနောက်ဆုံးပတ်ကတည်းက အနားယူနေရပြီး ပရီးမီးယားလိဂ်လက်ကျန်ပွဲစဉ် ရှစ်ပွဲစလုံးကို လွဲချော်ခဲ့သည်။ ၎င်းအနေဖြင့် ရီးယဲလ်အသင်းနှင့်ကစားမည့် ချန်ပီယံလိဂ် ဒုတိယအကျော့ပွဲကို လွဲချော်မည် ဖြစ်ကြောင်း ဂွါဒီယိုလာက ပြောကြားဖူးသော်လည်း ယခုအခါ အခြေအနေတိုးတက်လာခြင်းဖြစ်သည်။
“မက်ဒရစ်နဲ့ပွဲမှာ အားလုံးပါဝင်နိုင်မယ်လို့ ကျွန်တော်ထင်တယ်။ ပွဲပယ်ခံထားရတဲ့ မန်ဒီကလွဲလို့ပေါ့။ လေ့ကျင့်ခန်း အစီအစဉ်တွေမှာ အားလုံးပါဝင်နိုင်မှာပါ။ အဲဒီပွဲတွေကို စီနီယာကစားသမားတွေနဲ့ ရင်ဆိုင်သွားမှာပါ။ ဒီပွဲကိုကစားဖို့ သူတို့အဆင်သင့်ဖြစ်နေမလားဆိုတာ ကျွန်တော့်အတွက်တော့ နေ့တိုင်းဖြေရမယ့် စာမေးပွဲပါပဲ။ အာဆင်နယ်နဲ့ပွဲမှာ ကျွန်တော်တို့ အဆင်သင့်ဖြစ် မနေခဲ့ဘူး။ ဝက်ဖို့ဒ်နဲ့ပွဲမှာတော့ နည်းနည်း ပိုကောင်းလာပါတယ်။ ဒါပေမဲ့ အခုထက်ပိုပြီး ကောင်းလာဖို့ လိုနေပါသေးတယ်” ဟု ဂွါဒီယိုလာက ပြောကြားခဲ့သည်။
မန်စီးတီးအသင်းသည် ယနေ့ကစားမည့် ရာသီပိတ်ပွဲစဉ်အပြီးတွင် ရီးယဲလ်နှင့်ပွဲအတွက် ပြင်ဆင်ချိန် နှစ်ပတ်ရရှိမည်ဖြစ်သည်။ မန်စီးတီးနှင့် ရီးယဲလ်အသင်းသည် ချန်ပီယံလိဂ် ၁၆ သင်းအဆင့် ဒုတိယအကျော့ပွဲအဖြစ် သြဂုတ် ၇ ရက်တွင် အီတီဟတ်ကွင်း၌ ယှဉ်ပြိုင်ကစားရမည်ဖြစ်ပြီး ပထမအကျော့တွင် မန်စီးတီးအသင်းက အဝေးကွင်း၌ (၂-၁) ဂိုး ဖြင့် အနိုင်ရထားသည်။ ၎င်းတို့အတွဲမှ အနိုင်ရမည့်သူမှာ လိုင်ယွန်-ဂျူဗင်တပ်စ်အတွဲမှ အနိုင်ရသူနှင့် ဆုံတွေ့မည်ဖြစ်သည်။
