ရိုးမားအသင်းမှာ အစစအရာရာပြီးပြည့်စုံသောအသင်းတစ်သင်းဖြစ်ပြီး မိမိအတွက် မှန်ကန်သောရွေးချယ်မှုတစ်ခုဖြစ်သည်ဟု ကစားသမားသစ် အော်ဝါဆို

ရိုးမားအသင်းသို့ပြောင်းရွှေ့လာခဲ့သည့် ပြင်သစ်လက်ရွေးစင်ကွင်းလယ်လူ အော်ဝါက ရိုးမားအသင်းသို့ ပြောင်းရွှေ့ခွင့်ရခဲ့သည့်အတွက်ပျော်ရွှင်မိကြောင်း၊ ရိုးမားအသင်းသည် သမိုင်းအစဉ်အလာကြီးမားပြီး အစစအရာရာပြီးပြည့်စုံသည့်အသင်းတစ်သင်းဖြစ်ကြောင်းနှင့် မိမိအတွက် မှန်ကန်သည့် ရွေးချယ်မှုတစ်ခု ဖြစ်ကြောင်း ရိုးမားအသင်း ဝက်ဘ်ဆိုက်နှင့် ပြုလုပ်ခဲ့သော အင်တာဗျူးတွင် ဖြေကြားခဲ့သည်။

ရိုးမားအသင်းသည် ပြီးခဲ့သည့်  ဇွန်လ (၁၂)ရက်နေ့က လိုင်ယွန်အသင်းနှင့်စာချုပ်သက်တမ်းကုန်ဆုံးခဲ့သည့် ပြင်သစ်လက်ရွေးစင်ကွင်းလယ်လူ အော်ဝါအား အလွတ်ပြောင်းရွှေ့ကြေးနှင့် ခေါ်ယူခဲ့ကြောင်း အတည်ပြုကြေညာခဲ့သည်။

အသက် (၂၄)နှစ်အရွယ်ရှိအော်ဝါသည် လိုင်ယွန်အသင်း အကယ်ဒမီထွက်ကစားသမားတစ်ဦးဖြစ်ပြီး လိုင်ယွန်အသင်းကြီးအတွက် (၇)ရာသီအတွင်း ပြိုင်ပွဲစုံ (၂၃၃)ပွဲ ကစားရာတွင် (၄၁)ဂိုးအထိသွင်းယူ ပေးနိုင်ခဲ့သူဖြစ်သည်။

အော်ဝါသည် ပြီးခဲ့သည့် (၂)ရာသီအတွင်းက အာဆင်နယ်၊ စပါးတို့အပါအဝင် ဥရောပထိပ်တန်းကလပ်အသင်းကြီးများနှင့် သတင်းများထွက်ပေါ်ခဲ့ပြီး လိုင်ယွန်အသင်းနှင့် စာချုပ်သစ်ချုပ်ဆိုရန်အဆင်မပြေဖြစ်ခဲ့ချိန်တွင် ရိုးမားအသင်းက လက်ဦးမှုရယူခဲ့ခြင်းဖြစ်သည်။

ရိုးမားနှင့်ပတ်သက်ပြီး အော်ဝါက “ရိုးမားအသင်းနဲ့ စာချုပ်ချုပ်နိုင်ခဲ့တဲ့အတွက် ကျွန်တော်အလွန်ပျော်ရွှင်ပါတယ်။ ဘာကြောင့်လဲဆိုတော့ သူတို့ဟာသမိုင်းအစဉ်အလာကြီးမားတဲ့ ထိပ်တန်းအသင်းတစ်သင်းဖြစ်ပြီး  အရည်အသွေးမြင့်ကစားသမားတွေ၊ နှစ်လိုဖွယ်ကောင်းတဲ့ပရိသတ်တွေနဲ့ အစစအရာရာပြီးပြည့်စုံတဲ့အသင်း ဖြစ်နေလို့ပါ။ ဒါဟာကျွန်တော့်အတွက် မှန်ကန်တဲ့ရွေးချယ်မှုဖြစ်ပြီး ရိုးမားနဲ့အတူ တိုက်ပွဲဝင်ဖို့ အသင့်ဖြစ်နေပါပြီ” ဟု အသင်းနှင့်စာချုပ်ချုပ်ဆိုအပြီးတွင် ပြောကြားခဲ့သည်။

ရိုးမားအသင်းသည် အော်ဝါအား ၂၀၂၈ ခုနှစ်အထိ သက်တမ်းရှိမည့် (၅)နှစ်စာချုပ်ကို ချုပ်ဆိုခဲ့သည်။