ယခုရာသီကုန်တွင် အက်သလက်တီကိုမက်ဒရစ်အသင်းထံမှ ထွက်ခွာရန် စီစဉ်နေသည့် ဥရုဂွေးဝါရင့်တိုက်စစ်မှူး လူးဝစ်ဆွာရက်ဇ်အား အသင်းဟောင်း အေဂျက်စ်အပါအဝင် ဥရောပထိပ်တန်းအသင်းများက စိတ်ဝင်စားနေကြကြောင်း သိရှိရသည်။
ဆွာရက်ဇ်သည် အက်သလက်တီကိုမက်ဒရစ်အသင်းနှင့် ပထမဆုံးလက်တွဲသည့်ရာသီတွင် အသင်းအတွက် လာလီဂါသွင်းဂိုး (၂၁) ဂိုးသွင်းယူပေးခဲ့ပြီး၊ လာလီဂါအမှတ်ပေးချန်ပီယံဆုကိုလည်း ရယူနိုင်ခဲ့သည်။
ယခုရာသီတွင်မူ အက်သလက်တီကိုအသင်းတွင် အရေးပါမှုလျော့ကျလာသလို စာချုပ်သက်တမ်းကုန်ဆုံးတော့မည့် ၎င်းအား အသင်းကလည်း သက်တမ်းတိုးရန် ဆွေးနွေးခြင်းမရှိသေးချေ။
ယင်းအတွက် ဆွာရက်ဇ်သည် အသင်းမှ ထွက်ခွာရန် စီစဉ်လာခဲ့ခြင်းဖြစ်သည်။
ဆွာရက်ဇ်အား ခေါ်ယူလိုသည့် အသင်းများထဲတွင် အသင်းဟောင်း အေဂျက်စ်အသင်းပါဝင်နေသလို အခြားဥရောပထိပ်တန်းအသင်းကြီးများဖြစ်သည့် အင်တာမီလန်၊ ဆီဗီလာ စသည့် အသင်းများလည်း ပါဝင်နေပြီး ဆွာရက်ဇ်ကိုယ်တိုင်ကမူ အနာဂတ် နှင့်ပတ်သက်ပြီး ယတိပြတ်ပြောဆိုခြင်း မရှိသေးချေ။
