ရပ်ရှ်ဖို့ဒ်ရဲ့ နောက်ကျသွင်းဂိုးနဲ့ အနိုင်ရခဲ့တဲ့ မန်ယူ

မန်ယူ ၁-၀ ဝုလ်ဗ်

ပြီးခဲ့တဲ့ စနေနေ့က ကစားခဲ့တဲ့ပွဲမှာ လက်စတာအသင်းကို သရေသာကစားနိုင်ခဲ့တဲ့ မန်ယူအသင်းဟာ အိမ်ကွင်း အိုးလ်ထရက်ဖို့ဒ်မှာ ဝုလ်ဗ်အသင်းကို ခက်ခက်ခဲခဲ ကစားခဲ့ရပြီး ရပ်ရှ်ဖို့ဒ်ရဲ့ နောက်ကျသွင်းဂိုးနဲ့ အနိုင်ရရှိခဲ့ပါတယ်။

ဆိုးလ်ရှားဟာ တိုက်စစ်မှာ ကာဗာနီကို အထောင်ထားပြီး ဘရူနိုဖာနန်ဒက်ဇ်၊ ရက်ရှ်ဖို့ဒ်၊ ဂရင်းဝုဒ်၊ ပေါ့ဘာ၊ မာတာတို့ ပွဲထုတ်ခဲ့ပြီး ၄-၂-၃-၁ ပုံစံနဲ့ ကစားခဲ့ပါတယ်။ ဝုလ်ဗ်ကတော့ အဒါမာထရာအိုရေး၊ နေတို၊ မော်တင်ဟိုတို့နဲ့ လူစုံထုတ်ကာ မန်ယူကို ရင်ဆိုင်ခဲ့တာပါ။

မန်ယူအသင်းဟာ ပွဲစကတည်းက ဘောလုံးပိုင်ဆိုင်မှုအသာနဲ့ ဝုလ်ဗ်အသင်းကို ဖိအားပေးဖို့ ကြိုးစားခဲ့ပါတယ်။ ဒါပေမဲ့ ဝုလ်ဗ်ရဲ့ မာထန်တဲ့ ခံစစ်ကြောင်းကို ထိုးဖောက်ဖို့ အခက်တွေ့နေခဲ့သလို၊ ဝုလ်ဗ်ရဲ့ တန်ပြန်တိုက်စစ်တွေကလည်း မန်ယူအသင်းကို အခက်တွေ့စေခဲ့ပါတယ်။

အထူးသဖြင့် နေတို၊ အဒါမာထရာအိုရေးတို့ဟာ တန်ပြန်တိုက်စစ်တွေနဲ့ မန်ယူခံစစ်ကို ဒုက္ခပေးနိုင်ခဲ့ပြီး ဂိုးသွင်းခွင့်တွေလည်း ရရှိခဲ့ပါတယ်။ ပထမပိုင်းမှာ ဝုလ်ဗ်ဘက်က နေတို၊ ဆိုင်ယက်စ်တို့ရဲ့ ကန်ချက်တွေကို ဂိုးသမား ဒီဟေးယား ကာကွယ်နိုင်ခဲ့လို့သာ မန်ယူအသင်း သက်သာခဲ့တာပါ။

မန်ယူကတော့ ဝုလ်ဗ်ရဲ့ ခံစစ်ကို ထိုးဖောက်ဖို့ ခက်နေခဲ့သလို၊ ရရှိလာတဲ့ အခွင့်အရေးတချို့ကိုလည်း ကာဗာနီ၊ ရပ်ရှ်ဖို့ဒ်တို့ အသုံးချနိုင်ခဲ့ခြင်းမရှိပါဘူး။ ပထမပိုင်း ပွဲချိန် (၃၄)မိနစ်မှာ ဂရင်းဝုဒ်ရဲ့ ဖြတ်တင်ပေးပို့မှုကို ဘရူနိုဖာနန်ဒက်စ်ရဲ့ အနီးကပ် ပိတ်သွင်းခွင့်ရခဲ့ပေမဲ့ ဝုလ်ဗ်ဂိုးသမား ပတ်ထရီစီယို ကာကွယ်နိုင်ခဲ့ပါတယ်။

မန်ယူအသင်းဟာ ဒုတိယပိုင်းမှာလည်း ဝုလ်ဗ်အသင်းကို ဖိကစားနိုင်ခဲ့ပေမဲ့ ဂိုးရဖို့ ရုန်းကန်ခဲ့ပြီး ပွဲချိန် (၆၄)မိနစ်မှာတော့ ဆိုးလ်ရှားက ဂရင်းဝုဒ်အစား မာစီယဲလ်ကို ထည့်သွင်းကစားခဲ့ပါတယ်။ မာစီယဲလ် ဝင်လာပြီးနောက်မှာ မန်ယူဟာ တိုက်စစ်ပိုဖွင့်ပြီး ကစားခဲ့ပါတယ်။

ပွဲချိန် (၆၈)မိနစ်မှာ လုခ်ရှောရဲ့ ဖြတ်တင်ပေးပို့မှုကို ဘာယီ ခေါင်းတိုက်ရာမှ ဝုလ်ဗ်နောက်ခံလူတွေနဲ့ ထိပြီး ထွက်လာတာကို ကာဗာနီ အနီးကပ် ပိတ်သွင်းခဲ့ပေမဲ့ လူကျွံနေလို့ ဂိုးမရခဲ့ပါဘူး။ တကယ်တော့ ဘာယီရဲ့ ခေါင်းတိုက်ချက်ဟာ ဝုလ်ဗ်နောက်ခံလူ ကိုအာဒီရဲ့လက်နဲ့ထိခဲ့ပေမဲ့ ကွင်းလယ်ဒိုင်ကတော့ VAR တောင် မကြည့်ဘဲ ပယ်ချခဲ့တာပါ။

အဲဒီနောက်ပိုင်းမှာလည်း မန်ယူတို့ ဂိုးရဖို့ တောက်လျှောက်ကြိုးစားခဲ့ပြီး ပေါ့ဘာရဲ့ အဝေးကန်ချက်ကို ဝုလ်ဗ်ဂိုးသမား ပတ်ထရီစီယို ကာကွယ်နိုင်ခဲ့သလို၊ ရပ်ရှ်ဖို့ဒ်ကလည်း အခွင့်အရေးတွေကို အသုံးချနိုင်ခြင်း မရှိခဲ့ပါဘူး။

ဝုလ်ဗ်ကတော့ ခံစစ်ကို မာကျောစွာကစားရင်း ပထမပိုင်းကလိုပဲ မန်ယူကို တန်ပြန်တိုက်စစ်တွေကနေ ခြိမ်းခြောက်ခဲ့ပြီး ဒုတိယပိုင်းမှာလည်း အလုပ်ဖြစ်ခဲ့ပေမဲ့ ဂိုးရလောက်အထိ မစွမ်းဆောင်နိုင်ခဲ့ပါဘူး။

ဂိုးမရှိသရေနဲ့ပဲ ပွဲပြီးတော့မယ်လို့ ထင်မှတ်ခဲ့ရပေမဲ့ မိနစ် (၉၀)ပြည့်လို့ နာကျင်အချိန်ပို (၃)မိနစ်မှာတော့ ဘရူဖာနန်ဒက်စ်ရဲ့ ကွင်းလယ်က ဖန်တီးပေးတာကို ရပ်ရှ်ဖို့ဒ်က ဝုလ်ဗ်အသင်းရဲ့ လူကျွံထောင်ချောက်ကို ဖောက်ထွက်ပြီး ပယ်နယ်တီအတွင်းက ကန်သွင်းရာမှာ ဝုလ်ဗ်နောက်ခံလူနဲ့ထိကာ လမ်းကြောင်းပြောင်းကာ ဂိုးသွင်းခဲ့လို့ မန်ယူတို့ အနိုင်ရခဲ့ပါတယ်။ ဒီဂိုးဟာ ရပ်ရှ်ဖို့ဒ်အတွက် ဒီရာသီ ပရီးမီးယားလိဂ်မှာ (၇)ဂိုးမြောက် သွင်းဂိုးလည်း ဖြစ်ခဲ့ပါတယ်။

ဒီပွဲမှာ အနိုင်ရခဲ့တဲ့ မန်ယူအသင်းဟာ ပရီးမီးယားလိဂ်ပွဲစဉ် (၁၅)ပွဲကစားပြီးချိန်မှာ ရမှတ် (၃၀)မှတ်နဲ့ အဆင့် (၂)နေရာအထိ တက်လှမ်းလာနိုင်ခဲ့ပြီး အဆင့် (၁)နေရာက လီဗာပူးလ် (၃၂ မှတ်)ကို (၂)မှတ်အကွာနဲ့ ဖိအားပေးနိုင်ခဲ့ပါတယ်။