ရက်ရှ်ဖို့သည် ဥရောပ၏ အကောင်းဆုံးအဆုံးသတ်သမားတစ်ဦးဖြစ်လာနေပြီး လက်ရှိခြေစွမ်းကို ဆက်ထိန်းထားရန်အတွက် အပြင်းအထန်ဆက်လက်ကြိုးစားရန် လိုအပ်ကြောင်း အာရုံစိုက်မှု ထွေပြားသွားသည်နှင့် ခြေစွမ်းကျသွားနိုင်ကြောင်း တန်းဟက်က သတိပေးပြောဆိုလိုက်သည်။
မန်ယူက လိဒ်ကို ၂-၀ ဖြင့်အနိုင်ရသည့်ပွဲတွင် အင်္ဂလန်နိုင်ငံတကာကစားသမားသည် တစ်ဂိုးသွင်းယူခဲ့ပြီး ကမ္ဘာ့ဖလားပြီးနောက်တွင် ၁၅ ပွဲကစားရာတွင် ၁၃ ဂိုးသွင်းယူနိုင်ခြင်းအဖြစ်လည်း မှတ်တမ်းဝင်ခဲ့သည်။ တန်းဟက်က ရက်ရှ်ဖို့သည် ဥရောပ၏ အကောင်းဆုံးတိုက်စစ်မှူးများတွင်အပါဝင်ဖြစ်ကြောင်း အဆိုပါဂိုးသွင်းအပြီးတွင် ပြောဆိုလိုက်သည်။
“သူက သေချာပေါက် ဥရောပရဲ့အကောင်းဆုံးတွေထဲက တစ်ယောက်ဖြစ်ပါတယ်။ စပြီးတွေ့ကတည်းက သိသာပါတယ်။ သူနဲ့အလုပ်တွဲလုပ်ရတာက ဂုဏ်ယူစရာဖြစ်ပြီး ရက်ရှ်ဖို့ကို ပိုကောင်းလာအောင်လုပ်နိုင်တယ်ဆိုတာ စတွေ့ကတည်းကသိပါတယ်။ သူ့ဆီမှာ ဘောလုံးကျွမ်းကျင်မှုတွေအများကြီး ရှိသလို အခြားအရည်အသွေးတွေလည်း အများကြီးပါ။ သူက အလုပ်ပိုကြိုးစားရင်း ခြေနှစ်ချောင်းစလုံးနဲ့ ခေါင်းကို ပါအသုံးပြုပြီး ဂိုးသွင်းနိုင်ရင် အခုထက်ဂိုးတွေ အများကြီးပိုရဦးမှာ ဖြစ်ပါတယ်”ဟု တန်းဟက်က ပြောသည်။
