အင်္ဂလန်အသင်းတိုက်စစ်မှူး ဟာရီကိန်းက မိမိအနေဖြင့် လာမည့် (၂)နှစ်အတွင်း ကျင်းပမည့် ယူရိုနှင့် ကမ္ဘာ့ဖလားပြိုင်ပွဲများတွင် ချန်ပီယံဆုများရယူရန် ပစ်မှတ်ထားနေကြောင်း ပြောကြားခဲ့သည်။
အသက် (၂၇)နှစ်အရွယ်ရှိ စပါးတိုက်စစ်မှူး ဟာရီကိန်းသည် အင်္ဂလန်လက်ရွေးစင်ကစားသမားဘဝတွင် အသင်းနှင့်အတူ ချန်ပီယံဆုများ ရယူနိုင်ခဲ့သေးခြင်းမရှိသေးပေ။
ထို့ကြောင့် ဟာရီကိန်းက မိမိအနေဖြင့် ၂၀၂၁ တွင် ကျင်းပမည့် ယူရို-၂၀၂၀ ပြိုင်ပွဲနှင့် ကာတာနိုင်ငံတွင် ကျင်းပမည့် ၂၀၂၂ ကမ္ဘာ့ဖလားပြိုင်ပွဲများတွင် အင်္ဂလန်အသင်းနှင့်အတူ ချန်ပီယံဆုများ ရယူရန် ပစ်မှတ်ထားနေခြင်းဖြစ်သည်။
ဟာရီကိန်းက “ကျွန်တော် (၂၇)နှစ် ရှိပါပြီ။ လာမယ့် (၂)နှစ်အတွင်း အဓိကပြိုင်ပွဲကြီး (၂)ခုကို ကစားရမှာဖြစ်ပြီး ဒါက ကျွန်တော့်အတွက်ရော၊ အင်္ဂလန်အသင်းအတွက်ပါ ဆုဖလားတွေ ရယူဖို့ စစ်မှန်တဲ့အခွင့်အရေးပါပဲ။ ကျွန်တော့်အနေနဲ့ ကစားသမားဘဝမှာ နှစ်တွေအများကြီး ဖြတ်သန်းဖို့ ကျန်ရှိနေသေးပေမယ့် လာမယ့် (၂)နှစ်က အရမ်းကို အရေးကြီးပါတယ်။ ကျွန်တော့်အနေနဲ့ အကောင်းဆုံးစွမ်းဆောင်နိုင်ဖို့ လိုပါတယ်။ ပြီးခဲ့တဲ့ (၂)နှစ်အတွင်းမှာတော့ ဒဏ်ရာပြဿနာတွေကြောင့် ကျွန်တော် ရုန်းကန်ခဲ့ရပါတယ်။ ကျွန်တော့်အနေနဲ့ အသင်းအတွက် ကိုယ်တိုင်ဂိုးသွင်းဖို့ရော ဂိုးဖန်တီးမှုတွေပါ ပြုလုပ်ပေးနိုင်မယ်လို့ ယုံကြည်ပါတယ်”ဟု ပြောကြားခဲ့သည်။
ဟာရီကိန်းသည် ရုရှားနိုင်ငံတွင် ကျင်းပခဲ့သည့် ၂၀၁၈ ကမ္ဘာ့ဖလားပြိုင်ပွဲတွင် သွင်းဂိုး (၆)ဂိုးဖြင့် ရွှေဖိနပ်ဆုရရှိခဲ့သူဖြစ်ပြီး ယင်းနောက်ပိုင်းတွင် ဒဏ်ရာပြဿနာများနှင့် ရုန်းကန်ခဲ့ရသူဖြစ်သည်။
ဟာရီကိန်းသည် အင်္ဂလန်လက်ရွေးစင်အသင်းအတွက် ၂၀၁၅ ခုနှစ်တွင် စတင်ပွဲထွက်ခဲ့ပြီး အသင်းအတွက် (၄၅)ပွဲတွင် (၃၂)ဂိုး သွင်းယူထားသည်။
