ဝက်စ်ဟမ်းအသင်းမှ ယူကရိန်းလက်ရွေးစင်တိုက်စစ်ကစားသမား ယာမိုလန်ကိုသည် ရုရှား၏ကျူးကျော်စစ်ကို ခုခံနေရသည့် ယူကရိန်းတပ်မတော်ထံ ပေါင် ၇၅၀၀၀ လှူ ဒါန်းခဲ့ကြောင်း သိရသည်။
ဝက်စ်ဟမ်းအသင်းတွင် တစ်ပတ်လစာ ပေါင် ၁၁၅၀၀၀ ရရှိနေသည့် ယာမိုလန်ကိုသည် ယူကရိန်းငွေကြေး Hryvnia သုံးသန်း (ပေါင် ၇၄၅၄၀ နှင့်ညီမျှ) လှူဒါန်းခဲ့သည်ဟု ယူကရိန်းဘောလုံးသတင်းများကို ဖော်ပြလေ့ရှိသည့် Zorya Londonsk Twitter ၌ ရေးသားခဲ့သည်။
ယာမိုလန်ကိုကို ယူကရိန်းမိဘနှစ်ဦးမှ ရုရှားတွင် မွေးဖွားခဲ့ပြီး ကလေးဘဝတွင် မိခင်နိုင်ငံသို့ ပြောင်းရွှေ့ခဲ့သည်။ ပြီးခဲ့သည့် ဝုလ်ဗ်နှင့်ပွဲတွင် ယာမိုလန်ကို ပါဝင်ခြင်း မရှိသော်လည်း အသင်းဖော်များက သူ၏အမည်ရေးထိုးထားသည့် ဂျာစီများနှင့် သွေးပူလေ့ကျင့်ခန်း ပြုလုပ်ခဲ့ကြသည်။
