ဥရောပဘောလုံးအဖွဲ့ချုပ် (UEFA) သည် ယခုရာသီ ဥရောပကလပ်အသင်းပြိုင်ပွဲ(၄)ခုတွင် ဗိုလ်လုပွဲသို့ တက်ရောက်နိုင်သည့် အသင်းများမှ ပရိသတ်များအား လက်မှတ် (၃၀၀၀၀) အခမဲ့ပေးဝေသွားမည်ဖြစ်ကြောင်း သိရသည်။
အဆိုပါကလပ်အသင်းပြိုင်ပွဲ(၄)ခုမှာ ချန်ပီယံလိဂ်၊ ယူရိုပါလိဂ်၊ ကွန်းဖရန့်လိဂ်နှင့် အမျိုးသမီးချန်ပီယံလိဂ်ပြိုင်ပွဲတို့ ဖြစ်ပြီး ကပ်ဘေးကာလအတွင်းမှာပင် သစ္စာရှိစွာအားပေးနေကြသော ပရိသတ်များကို ကျေးဇူးတုံ့ပြန်သည့်သဘောဖြစ်ကြောင်းသိရသည်။
UEFA ဥက္ကဋ္ဌ ဆယ်ဖာရင်က ” ဘောလုံး ပရိသတ်ဆိုတာ ဘောလုံးပွဲရဲ့ အသက်သွေးကြောပါ။ ပြီးတော့ ကပ်ဘေးနဲ့ ရင်ဆိုင်နေရတဲ့ (၂)နှစ်ကျော်ကာလမှာ အခက်အခဲတွေကို ရင်ဆိုင်ပြီး အားပေးနေရတယ်ဆိုတာလည်း ကျွန်တော်တို့ တွေးမိခဲ့ပါတယ်။ ပရိသတ်ဆိုတာ ဘောလုံးလောက တိုးတက်ရေးအတွက် အဓိကနေရာက ပါဝင်ကစားနေကြသူတွေပါ” ဟု ပြောကြားခဲ့သည်။
UEFA က လက်မှတ်အခမဲ့ပေးဝေရန် ခွဲတမ်းသတ်မှတ်ထားမှုမှာ ချန်ပီယံလိဂ်ပြိုင်ပွဲအတွက် (၁၀၀၀၀)၊ ယူရိုပါလိဂ်ပြိုင်ပွဲဲအတွက် (၈၀၀၀)၊ ကွန်းဖရန့်လိဂ်နှင့် အမျိုးသမီး ချန်ပီယံလိဂ်ပြိုင်ပွဲအတွက် (၆၀၀၀)စီဖြစ်သည်။ ပြိုင်ပွဲ(၄)ခု၌ ဗိုလ်လုပွဲရောက်ရှိသည့် ကလပ်အသင်းများသည် အဆိုပါလက်မှတ်ခွဲတမ်းမှ တစ်ဝက်စီရရှိမည်ဖြစ်သည်။
ကလပ်အသင်းများအနေဖြင့် လက်မှတ်အခမဲ့ပေးရန် ပရိသတ်ရွေးချယ်ရာတွင်မူ တစ်ရာသီစာလက်မှတ် နှစ်အကြာဆုံးဝယ်ယူအား ပေးခဲ့သူများ၊ အဝေးကွင်းပွဲစဉ်များကို အများဆုံးလိုက်ပါအားပေးခဲ့သူများ စသည့်အချက်များအပေါ် အဓိကအခြေခံရွေး ချယ်ဖွယ်ရှိကြောင်း သိရသည်။
ထို့ပြင် UEFA သည် ပရိသတ်များ ကုန်ကျစရိတ်သက်သာစေရန်အတွက် ချန်ပီယံလိဂ်ဗိုလ်လုပွဲ၌ Category 3 လက်မှတ်အား ယူရို(၁၈၀)၊ Category 4 လက်မှတ်အား ယူရို(၇၀)အဖြစ် သတ်မှတ်ထားခြင်းကိုလည်း လာမည့်ပြိုင်ပွဲ(၃)ကြိမ်အထိ ယင်းနှုန်းထားအတိုင်း မပြောင်းလဲဘဲ ဆက်လက်ထားရှိသွားရန် ဆုံးဖြတ်ခဲ့ကြောင်း သိရသည်။
