ပရီးမီးယားလိဂ်အမှုဆောင်ချုပ် ရစ်ချက်မာစတာစ်က ၂၀၂၀-၂၁ ရာသီတွင် ပရိသတ်များကို ကွင်းအတွင်း ဝင်ရောက်ခွင့်ပြုနိုင်ရန် အလွန်အရေးကြီးပြီး ဝင်ခွင့်မပြုနိုင်ခဲ့ပါက အသင်းများအနေဖြင့် ပေါင်သန်း(ရဝဝ)ခန့် နစ်နာလိမ့်မည်ဟု BBC သတင်းဌာနသို့ ပြောကြားခဲ့သည်။
အင်္ဂလိပ်ဘောလုံးလောက၌ ပရိသတ်မပါဘဲ ကွင်းပိတ်ကစားနေသည်မှာ ဇွန်လကတည်းကဖြစ်ပြီး ယခုရာသီကိုလည်း ပရိသတ်မပါဘဲ ကစားရနိုင်ခြေရှိနေသည်။
ကနဦးဆွေးနွေးမှုများအရ အောက်တိုဘာလတွင် ပရိသတ်ဝင်ခွင့်ပြုနိုင်ရန် စီစဉ်လျက် ရှိသည်။ သို့ရာတွင် အစိုးရ၏ ကန့်သတ်ချက်များအရ ယင်းအစီအစဉ်ကို အကောင်အထည်ဖော်ရန် ခက်ခဲဖွယ်ရှိနေသည်။
ရစ်ချက်မာစတာစ်က ပရိသတ်များကို ကွင်းအတွင်း ဝင်ခွင့်ပြုရန်ကိစ္စမှာ အလွန်အရေးကြီးပြီး အသင်းတိုင်း၏ ဘဏ္ဍာရေးပိုင်းကို သက်ရောက်မည် ဖြစ်သည်ဟု ပြောကြားခဲ့သည်။
ရစ်ချက်မာစတာစ်က “ကျွန်တော်တို့အနေနဲ့ ပရိသတ်တွေ ကွင်းထဲဝင်နိုင်ဖို့ မြန်နိုင်သမျှ မြန်မြန်လိုအပ်နေပါတယ်။ စီးပွားရေးအရရော၊ တခြားအကြောင်းတွေအတွက်ပါ ဒီအရေးက ဦးစားပေး ပထမကိစ္စဖြစ်ပါတယ်။ အစိုးရက ဘယ်လိုဆုံးဖြတ်မလဲ စောင့်ရပါမယ်။ ဆွေးနွေးမှုတွေလည်း လုပ်နေပါတယ်။ စက်တင်ဘာက ပုံမှန်ဘဝဆီကို ပြန်သွားဖို့ ပထမဆုံးလဖြစ်တဲ့အတွက် ခက်ခဲမယ်ဆိုတာ အစောကတည်းက သိပြီးသားပါ။ ပရိသတ်မပါဘဲ ပြိုင်ပွဲကို ကျင်းပရရင်တော့ ဒီရာသီမှာ ပေါင်သန်း(ရဝဝ)လောက် ဆုံးရှုံးရပါလိမ့်မယ်”ဟု ပြောကြားခဲ့သည်။
