ရီးယဲလ်မက်ဒရစ်အသင်း၏ နည်းပြဖြစ်သူ ဇီဒန်းက စပိန်မီဒီယာများသည် မိမိနှင့် အသင်းမှ ကစားသမားများဖြစ်သည့် ဂါရတ်ဘေးလ်၊ ဟာမီးစ်တို့အကြား ပြဿနာဖြစ်အောင် အမြဲကြိုးပမ်းနေလေ့ရှိကြောင်းနှင့် ယင်းရည်ရွယ်ချက်မှာ ဘယ်တော့မှ အောင်မြင်လိမ့်မည်မဟုတ်ကြောင်း ပြောကြားခဲ့သည်။
ဇီဒန်းက နည်းဗျူဟာပိုင်း ဆုံးဖြတ်ချက်အရ ဂါရတ်ဘေးလ်အား အရန်ခုံတွင် ထိုင်ခိုင်းနေရသည့်တိုင် မိမိနှင့် ကစားသမားအကြားတွင် မည်သည့် ပြဿနာမျှမရှိကြောင်းနှင့် ဂါရတ်ဘေးလ်သည် အသင်း၏ အရေးပါသည့်ကစားသမားတစ်ဦးဖြစ်ကြောင်းလည်းပြောကြားခဲ့သည်။
ဘေးလ်သည် ရီးယဲလ်မက်ဒရစ်အသင်း၏ နောက်ဆုံးပွဲစဉ် (၅)ပွဲတွင် လုံးဝကစားခွင့်မရခဲ့ဘဲ အရန်ခုံတွင် ထိုင်နေရသည့် အချိန်များတွင်လည်း အိပ်ပျော်နေခြင်း၊ အဝေးကြည့်မှန်ပြောင်းပုံစံဖြင့် အဝေးကို မျှော်ကြည့်နေသည့် ပုံစံများ ပြုလုပ်ခဲ့ပြီး မီဒီယာများက ယင်းကဲ့သို့ လုပ်ဆောင်မှုများသည် ဇီဒန်း၏ ဆုံးဖြတ်ချက်များကို မကျေနပ်ကြောင်း ပြသသည့် လုပ်ဆောင်ချက်များဖြစ်ကြောင်း ရေးသားဖော်ပြခဲ့ကြသည်။
ဂရန်နာဒါနှင့်ပွဲအပြီး ဘေးလ်နှင့် ပတ်သက်ပြီး မေးမြန်းရာတွင်လည်း ဇီဒန်းက “ခင်ဗျားတို့ ဘေးလ်အကြောင်းကိုပဲ မေးပြန်ပြီလား။ ကျွန်တော်တို့က ပွဲအကြောင်းကိုပဲ စိတ်ဝင်စားပါတယ်။ ဘေးလ်လည်း ဒီလိုပါပဲ။ ခင်ဗျားတို့မီဒီယာတွေက ကျွန်တော် တို့နှစ်ဦးကြားမှာ ပြဿနာတွေဖန်တီးဖို့ကို ပိုပြီးအာရုံစိုက်နေကြတယ်။ ဒီလုပ်ရပ်က ဘယ်တော့မှ အောင်မြင်မှာမဟုတ်ပါဘူး။ သူနဲ့ ကျွန်တော့်ကြားမှာ ဘာပြဿနာမှ မရှိပါဘူး”ဟု ပြောကြားခဲ့သည်။
