ပြင်သစ်အသင်းခေါင်းဆောင် ဘာပေက အသင်းဖော်တိုက်စစ်မှူး မူအာနီသည် ပြီးပြည့်စုံသည့် ကစားသမားတစ်ဦးဖြစ်ကြောင်း ချီးကျူးပြောဆိုလိုက်သည်။ မူအာနီသည် တန်ကြေးပေါင် ၁၀၅ သန်းခန့်ရှိနေပြီး မန်ယူနှင့် လီဗာပူးအသင်းတို့က ခေါ်ယူရန် ပစ်မှတ်ထားခြင်း ခံနေရသူဖြစ်သည်။
သောကြာနေ့က နယ်သာလန်ကို ၄-၀ ဖြင့်အနိုင်ရရှိသည့်ပွဲတွင် ဘာပေနှင့် မူအာနီတို့သည် ပြင်သစ်အသင်းရှေ့တန်း၌ တွဲကစားခဲ့ကြသည်။ ဖရန့်ဖွတ်အသင်းတိုက်စစ်မှူးမူအာနီသည် ထိုပွဲတွင် ဂိုးမသွင်းနိုင်ခဲ့သော်လည်း ပြင်သစ်အသင်း၏ ရွေ့လျားပြီး အမြန်နှုန်းမြင့်မားစွာဖြင့် တိုက်စစ်ကစားသည့် စုဖွဲ့မှုတွင် အံဝင်အောင်ကစားနိုင်ခဲ့သည်။
အသက် ၂၄ နှစ်အရွယ်ရှိမူအာနီသည် ဂျာမန်ကလပ်အသင်း ဖရန့်ဖွတ်နှင့်လည်း လက်ရှိဘောလုံးရာသီတွင် ခြေစွမ်းပြနေသည်။ လက်ရှိဘောလုံးရာသီတွင် ဖရန့်ဖွတ်အသင်းအတွက် ပြိုင်ပွဲစုံ ၃၅ ပွဲကစားပြီး ၁၆ ဂိုးသွင်းကာ ၁၄ ဂိုးဖန်တီးပေးထားနိုင်သည်။
နယ်သာလန်ကို အနိုင်ရရှိသည့်ပွဲအပြီးတွင် မူအာနီသည် ဂိုးရရှိရန် ထိုက်တန်ကြောင်း ပြင်သစ်အသင်း နည်းပြချုပ် ဒေရှောင့်က ပြောဆိုလိုက်သလို အသင်းအတွက် အကျိုးပြုနိုင်သောမူအာနီ၏ ခြေစွမ်းကို ဘာပေကလည်း ချီးမွမ်းပြောဆိုလိုက်ခြင်းဖြစ်သည်။
“မူအာနီက ပြင်သစ်အသင်းတိုက်စစ်ကို မတူညီတဲ့ ရှုထောင့်မျိုးကနေ ကစားနိုင်အောင် ကူညီပေးနိုင်သူ တစ်ဦးဖြစ်ပါတယ်။ သူက အရမ်းကစားနိုင်ပြီး ပြီးပြည့်စုံတဲ့ တိုက်စစ်မှူးတစ်ဦးလို့လည်း ပြောလို့ရပါတယ်။ သောကြာနေ့က သူကစားသွားတာ သိပ်ကောင်းပါတယ်။ သူဂိုးတွေသွင်းနိုင်မယ်လို့လည်း ကျွန်တော် မျှော်လင့်ပါတယ်”ဟု ဘာပေက ပြောဆိုလိုက်သည်။
အသက် ၃၆ နှစ်အရွယ် ဂျရူးနှင့် အသက် ၃၅ နှစ်အရွယ် ဘန်ဇီမာတို့သည် နိုင်ငံအသင်းအတွက် ပါဝင်တော့မည်မဟုတ်ဘဲ မူအာနီသည် ပြင်သစ်လက်ရွေးစင်အသင်း၏ တိုက်စစ်မြှားဦးနေရာတွင် ရေရှည်ကစားမည့် ကစားသမားတစ်ဦးဖြစ်လာမည်ဖြစ်ကြောင်းလည်း မီဒီယာများက ဖော်ပြသည်။
မူအာနီက အသင်းကြီးတစ်သင်းသို့ ပြောင်းရွှေ့လိုကြောင်းလည်း ပြီးခဲ့သည့်တစ်ပတ်က ထုတ်ဖော်ပြောဆိုထားသည်။
