ဒေါ့မွန်အသင်းအားကစားဒါရိုက်တာ မီချယ်ဇော့၏ပြောစကားအရ အင်္ဂလန်လက်ရွေးစင်တောင်ပံကစားသမား ဆန်ချို၏အပြောင်းအရွှေ့မှာ ပျက်ပြယ်ခဲ့ပြီဖြစ်သော်လည်း မန်ယူအသင်းသို့ ရောက်ရှိမည်ဟု မန်ယူကစားသမားဟောင်းနှင့် ဘွန်ဒစ်လီဂါတွင် (၇)နှစ်ကြာကစားခဲ့သည့် အိုဝင်ဟားဂရေ့ဗ်စ်က အံ့အားသင့်ဖွယ်ဆိုခဲ့သည်။
မီချယ်ဇော့က မန်ယူအသင်း ခေါ်ယူရန် ကြိုးပမ်းနေသော ဆန်ချိုကို ယခုနွေရာသီတွင် ရောင်းချတော့မည်မဟုတ်ကြောင်းနှင့် ဆန်ချိုသည် လာမည့်ရာသီ၌ ဒေါ့မွန်အသင်းတွင်သာ ဆက်ရှိမည်ဖြစ်ကြောင်း ပြောကြားခဲ့သည်။
မန်ယူအသင်းသည် ဆန်ချိုကို ခေါ်ယူရန် ဆက်တိုက်ကြိုးပမ်းနေခဲ့ပြီး ပြောင်းရွှေ့ကြေးအား သုံးရစ်ခွဲပေးရန်ပင် သဘောတူညီမှုရရှိခဲ့ပြီဟု သတင်းထွက်ပေါ်ခဲ့သော်လည်း ဒေါ့မွန်အသင်းက ယင်းသတင်းများ မှန်ကန်ခြင်းမရှိဟု ငြင်းပယ်ခဲ့ခြင်းဖြစ်သည်။
သို့သော် မီချယ်ဇော့သည်၂၀၁၇ နွေရာသီက ဇွန်လတွင် ဒမ်ဘီလီကို ဘာစီလိုနာထံ ရောင်းမထုတ်မီကလည်း ယခုကဲ့သို့ ပြောကြားခဲ့ဖူးပြီး ဩဂုတ်လတွင် ရောင်းချခဲ့ကြောင်း မီဒီယာအချို့က ထောက်ပြခဲ့ကြသည်။
