ပြင်သစ်ထိပ်သီး PSG အသင်းသည် မန်ယူအသင်း ပစ်မှတ်ထားနေသည့် စပါးတိုက်စစ်မှူး ဟာရီကိန်းအား ခေါ်ယူရန် ကစားသမား၏ အေးဂျင့်နှင့် တွေ့ဆုံဆွေးနွေးခဲ့ကြောင်း သတင်းထွက်ပေါ်နေသည်။
ဟာရီကိန်း (၂၉ နှစ်)သည် ၂၀၂၄ ခုနှစ်တွင် စပါးအသင်းနှင့် စာချုပ်သက်တမ်းကုန်ဆုံးမည်ဖြစ်ပြီး လာမည့်နွေရာသီတွင် အသင်းပြောင်းရွှေ့မည်ဟု သတင်းထွက်နေသူဖြစ်သည်။
ဟာရီကိန်းအား ခေါ်ယူရန် မန်ယူအသင်းက ရေပန်းအစားဆုံး ဖြစ်နေသော်လည်း ယခုအခါ PSG အသင်းက လက်ဦးမှုရယူကာ ၎င်းကိုခေါ်ယူရန် ကြိုးပမ်းလာခြင်းဖြစ်သည်။
Foot Mercato ၏ ဖော်ပြချက်အရ PSG အသင်း၏ ဘောလုံးအကြံပေးဖြစ်သူ အိုကမ်ပို့စ်သည် ဟာရီကိန်း၏အေးဂျင့်နှင့် တွေ့ဆုံခဲ့ပြီး အပြောင်းအရွှေ့ကိစ္စအတွက် ဆွေးနွေးခဲ့ကြကြောင်း သိရှိရသည်။
PSG အသင်းသည် ယခုရာသီကုန်တွင် အသင်း၏နာမည်ကျော်တိုက်စစ်မှူး မက်ဆီကို လက်လွှတ်ရဖွယ်ရှိနေသလို၊ အသင်းပရိသတ်များ၏ငြိုငြင်ခြင်းခံနေရသည့် ဘရာဇီးလ်တိုက်စစ်မှူး နေမာကိုလည်း ရောင်းထုတ်ဖွယ်ရှိနေကြောင်း သိရှိရသည်။
ထို့ကြောင့် PSG အသင်းသည် လာမည့်နွေရာသီတွင် အသင်း၏တိုက်စစ်ပိုင်းကို အင်အားဖြည့်တင်းရန် စီစဉ်နေပြီး စပါးတိုက်စစ်မှူး ဟာရီကိန်းအပြင် နာပိုလီတိုက်စစ်မှူး အိုဆင်မန်ကိုလည်း ခေါ်ယူရန် ပစ်မှတ်ထားနေကြောင်း သိရှိရသည်။
