နာမည်ကျော်ပေါ်တူဂီဝါရင့်တိုက်စစ်မှူး စီရော်နယ်လ်ဒို ကစားနေသည့် ဆော်ဒီကလပ် အယ်လ်နာဆာအသင်းသည် မန်ယူနောက်ခံကစားသမား ဝမ်ဘစ်ဆာကာကို ခေါ်ယူရန်စီစဉ်နေကြောင်း The Telegraph က ဖော်ပြခဲ့သည်။
အယ်လ်နာဆာအသင်းသည် စပါးနောက်ခံကစားသမား အီမာဆန်ရွိုင်ရယ်လ်အား ခေါ်ယူရန်ကမ်းလှမ်းခဲ့သော်လည်း အဆင်မပြေသဖြင့် စီရော်နယ်လ်ဒို၏ အသင်းဖော်ဖြစ်သူ မန်ယူနောက်ခံကစားသမား ဝမ်ဘစ်ဆာကာကို ခေါ်ယူရန် စီစဉ်လာခြင်းဖြစ်ကြောင်း သိရှိရသည်။
အသက် (၂၆)နှစ်အရွယ်ရှိ အင်္ဂလန်နောက်ခံကစားသမား ဝမ်ဘစ်ဆာကာသည် မန်ယူအသင်းနှင့် ၂၀၂၅ ခုနှစ်တွင် စာချုပ်သက်တမ်းကုန်ဆုံးမည်ဖြစ်ပြီး ၎င်းသည် တစ်ပတ်လစာ ပေါင် (၉၀၀၀၀) ရရှိနေကြောင်း သိရသည်။
ဝမ်ဘစ်ဆာကာသည် ယခုရာသီတွင် တံကောက်ကြောဒဏ်ရာကြောင့် ရုန်းကန်ခဲ့ရသလို၊ မန်ယူအသင်းတွင် နောက်ခံကစားသမား ဒါလော့ကြောင့် ပုံမှန်ပွဲထွက်ခွင့်ရရန် ရုန်းကန်နေရသူလည်းဖြစ်သည်။
စီရော်နယ်လ်ဒို၏ အယ်လ်နာဆာအသင်းသည် ဆော်ဒီပရိုလိဂ်တွင် အမှတ်ပေးဇယားထိပ်ဆုံးမှ အယ်လ်ဟီလာအသင်းနှင့် (၇)မှတ်ကွာဟမှုကို လျှော့ချနိုင်ရန်အတွက် ယခုဇန်နဝါရီတွင် ထိပ်တန်းကစားသမားများ ခေါ်ယူရန် စီစဉ်နေခြင်းဖြစ်ပြီး ယခုအခါ မန်ယူနောက်ခံကစားသမား ဝမ်ဘစ်ဆာကာကို ပစ်မှတ်ထားလာခြင်းဖြစ်ကြောင်း သိရှိရသည်။
