အင်္ဂလန် ကွင်းလယ်လူဟောင်း ဖြစ်သူ ဒန်နီမာဖီက အကယ်လို့များ ဟယ်ရီမက်ဂွိုင်းယားသာ နွေရာသီမှာ မန်ချက်စတာယူနိုက်တက် အသင်းကနေ မထွက်ခွာခဲ့ဘူး ဆိုရင် သူ အတော် အံ့သြမိမှာ ဖြစ်တယ်လို့ ဆိုလိုက်ပါတယ်။ မက်ဂွိုင်းယားဟာ ယူနိုက်တက်မှာ ပုံမှန် ပွဲထွက်ခွင့် ပျောက်ဆုံးနေသူ ဖြစ်ပြီး နည်းပြ အဲရစ်တန်းဟတ်ဟာ ရာဖေးဗာရန်း နဲ့ မာတီနက်ဇ် တို့ကို ပထမဦးစားပေး နောက်ခံလူတွေ အတွက် သတ်မှတ်ထားပါတယ်။ ဒါ့ကြောင့်လည်း မက်ဂွိုင်းယားဟာ လက်ရွေးစင် အသင်း အနာဂတ် ထိခိုက်လာနိုင်တဲ့ အခြေအနေကြောင့် ရာသီကုန်မှာ ကလပ်သစ်ကို ရှာဖွေသွားဖို့ ရှိနေပါတယ်။
ယူနိုက်တက် ဘက်ကလည်း အသက် ၃၀ အရွယ် ကစားသမားအတွက် သင့်တော်တဲ့ ကမ်းလှမ်းမှုကို လက်ခံ ရရှိခဲ့မယ်ဆိုရင် နားထောင်သွားရန် အသင့် ဖြစ်နေတယ်လို့ သိရပါတယ်။ မက်ဂွိုင်းယား ကတော့ သူဟာ လက်ကျန် ဘောလုံးရာသီမှာ ယူနိုက်တက် အတွက် အရေးပါတဲ့ကဏ္ဍကနေ ပါ၀င်ခွင့် ရလိမ့်မယ်လို့ ယုံကြည်ထားကြောင်း ပြောထားခဲ့ပြီး ကာရာဘောင်ဖလားမှာ ဗိုလ်စွဲထားခဲ့တဲ့ ယူနိုက်တက်ဟာ အက်ဖ်အေဖလား နဲ့ ယူရိုပါလိဂ်ဖလား တို့မှာလည်း ဗိုလ်စွဲရန် ပစ်မှတ်ထားနေပါတယ်။
ဒါပေမယ့်လည်း မာဖီကတော့ အိုးထရပ်ဖို့ဒ်မှာ မက်ဂွိုင်းယားကို ကာလရှည် မြင်ရလ်ိမ့်မယ်လို့ မထင်မိကြောင်း ပြောလိုက်ပြီး လက်စတာ ကစားသမားဟောင်းကို လာမည့် ရာသီမှာ ကလပ်အသစ်မှာ မြင်ရလိမ့်မယ်လို့ ယုံကြည်ထားပါတယ်။
မာဖီက “ကမ္ဘာ့ဖလား ဒါမှမဟုတ် ယူရို တို့လို အဓိက ပြိုင်ပွဲကြီးတွေမှာ အကောင်းဆုံး ကစားနိုင်ဖို့ အတွက် ဆိုရင် ကလပ် level မှာ ပုံမှန် ကစားခွင့်ရဖို့ လိုအပ်မှု ရှိတယ်ဆိုတဲ့ ယူဆချက်ကို ဟယ်ရီမက်ဂွိုင်းယားက ကောင်းကောင်း ယုံကြည် လက်ခံထားသူ ဖြစ်ပါတယ်။ ဂါရက်ဆောက်ဂိတ် ဘက်ကလည်း အနာဂတ်မှာ မက်ဂွိုင်းယားကို မန်ချက်စတာယူနိုက်တက် အသင်းရဲ့ အရန်ခုံမှာ ထိုင်နေရတဲ့ အနေအထားထက် ပိုမို ကောင်းမွန်တဲ့ အခြေအနေကို လိုချင်မှာပါ။
မက်ဂွိုင်းယားဟာ အရန်ခုံကို ရောက်သွားခဲ့ပေမယ့်လည်း သူ့ရဲ့ အရမ်းကို ကောင်းတဲ့ ပရော်ဖက်ရှင်နယ် စိတ်ဓာတ်ကို ပြသကာ ကောင်းကောင်း တုန့်ပြန်ခဲ့ပါတယ်။ ဒါပေမယ့် အရန်ခုံမှာ သက်တောင့်သက်သာ ထိုင်နေတဲ့ ကစားသမားကို ဆောက်ဂိတ်ကော ကျနော်ကော သိပ်ပြီး သဘောမကျမိပါဘူး။ လာမည့် ရာသီမှာ မက်ဂွိုင်းယားကို အခြား ကလပ်ရဲ့ အကျီနဲ့ မမြင်ရဘူးဆိုရင် ကျနော် အတော်လေး အံ့အားသင့်မိမှာ ဖြစ်ပါတယ်။” လို့ ဆိုလိုက်ပါတယ်။
မက်ဂွိုင်းယားဟာ ပြီးခဲ့တဲ့ အပတ် ကြာသာပတေးနေ့က အင်္ဂလန်တို့ အီတလီကို အဝေးကွင်းမှာ ၂-၁ နဲ့ အနိုင်ရခဲ့တဲ့ ပွဲစဉ်ကိုရော မနေ့ညက ၀င်ဘာလေမှာ ယူကရိန်းကို အနိုင်ရရှိခဲ့တဲ့ ပွဲစဉ်မှာပါ the Three Lions တို့ အတွက် မိနစ် ၉၀ ပြည့် ၀င်ကစားခွင့်ရခဲ့သူ ဖြစ်ပြီး ဂါရက်ဆောက်ဂိတ်ရဲ့ အသင်းဟာ ယူရို ၂၀၂၄ ခြေစစ်ပွဲကို ၂ ပွဲကစား ၂ ပွဲ အနိုင်ရလဒ်နဲ့ အတူ အကောင်းဆုံး ပုံစံနဲ့ တာထွက်ထားနိုင်ခဲ့ပါတယ်။
