မန်စီးတီးအသင်း၏ အင်္ဂလန်တောင်ပံတိုက်စစ်ကစားသမား စတာလင်သည် မန်စီးတီးအသင်းတာဝန်ရှိသူများ၏ လုပ်ရပ်တစ်ခုအပေါ် ဒေါသထွက်လျက်ရှိနေပြီး အသင်းတွင် သူ၏အနာဂတ်နှင့်ပတ်သက်၍ စဉ်းစားသွားဖွယ်ရှိနေကြောင်း Mirror သတင်းစာက ဖော်ပြခဲ့သည်။
မန်စီးတီးအသင်းသည် မကြာသေးမီက စပါးတိုက်စစ်မှူး ဟာရီကိန်းအား ခေါ်ယူရန်ကမ်းလှမ်းရာ၌ စတာလင်ကို အလိုက်ပေးလဲလှယ်မည်ဟု စပါးအသင်းတာဝန်ရှိသူများထံ အသိပေးခဲ့သည်။
စပါးအသင်းသည် ၎င်းတို့၏တိုက်စစ်မှူးအတွက် ပြောင်းရွှေ့ ကြေးပေါင်သန်း (၁၀၀)အထက် သတ်မှတ်ထားရာ မန်စီးတီးအသင်းက ငွေကြေးနှင့်အတူ အလိုက်ပေးနိုင်သည့်ကစားသမားစာရင်းကို စပါးအသင်း ထံပေးပို့ခဲ့သည်။
ယင်းစာရင်းတွင် မာရက်ဇ်၊ ဂျေးဇူး၊ လာပေါ့တ်၊ ဘာနာဒိုဆေးလ်ဗားအစရှိသူတို့နှင့်အတူ စတာလင်၏အမည်စာရင်းလည်း ပါဝင်နေခြင်းဖြစ်သည်။
အခြားသော ကစားသမားများထံမှ မည်သည့်တုံ့ပြန်မှုမျှမရှိသော်လည်း စတာလင်သည် သူ၏အမည်ပါဝင်နေခြင်းအတွက် ဒေါသထွက်နေကြောင်း သိရှိ ရသည်။
၎င်းအနေဖြင့် အင်္ဂလန်နိုင်ငံတောင်ပိုင်းရှိ လန်ဒန်အခြေစိုက် စပါးအသင်းသို့ ပြောင်းရွှေ့ကစားနိုင်မည်မဟုတ်ဟု အတိအလင်းထုတ်ဖော်ပြောကြားခဲ့သလို၊ ယခုအခါ အသင်းတွင် သူ၏အနာဂတ်နှင့်ပတ်သက်၍လည်း စဉ်းစားနေပြီဖြစ်ကြောင်း သိရှိရသည်။
