မန်စီးတီးအသင်း ကစားသမားသစ်များမိတ်ဆက်ပွဲအခမ်းအနားပြုလုပ်ခဲ့ပြီး ဖျားနာနေခြင်းကြောင့် ကယ်လ်ဗင်ဖီးလစ် ပါဝင်နိုင်ခြင်းမရှိခဲ့

မန်စီးတီးအသင်းသည် ရာသီသစ်အတွက် ခေါ်ယူထားသည့်ကစားသမားသစ်များအား မိတ်ဆက်ပွဲအခမ်းအနားကို ပြီးခဲ့သည့်တနင်္ဂနွေနေ့က အီတီဟတ်ကွင်းတွင် ပြုလုပ်ခဲ့ရာ ဟော်လန်း၊ အယ်လ်ဗာရက်ဇ်နှင့် အော်တီဂါတို့(၃)ဦးကိုသာ မိတ်ဆက်နိုင်ခဲ့ပြီး အင်္ဂလန်ကစားသမား ကယ်လ်ဗင်ဖီးလစ်မှာမူ ဖျားနာနေခြင်းကြောင့် ပျက်ကွက်ခဲ့ကြောင်း သိရသည်။

မန်စီးတီးအသင်းသည် ယခုနွေရာသီ အပြောင်းအရွှေ့ကာလတွင် ဒေါ့မွန်အသင်းမှ နော်ဝေတိုက်စစ်မှူး ဟော်လန်း၊ အာမီးနီးယားအသင်းမှ ဂျာမန်ဂိုးသမား စတီဖန်အော်တီဂါ၊ လိဒ်စ်အသင်းမှ အင်္ဂလန်ကွင်းလယ်ကစားသမား ကယ်လ်ဗင်ဖီးလစ်တို့ကို ခေါ်ယူထားပြီး ရေးဗားပလိတ်အသင်းမှ အာဂျင်တီးနားတိုက်စစ်မှူး ယူလီယန်အယ်လ်ဗာရက်ဇ်ကိုမူ ပြီးခဲ့သည့် ဇန်နဝါရီအပြောင်းအရွှေ့ကတည်းက ခေါ်ယူထားခဲ့ခြင်းဖြစ်သည်။

သို့သော် ၎င်းကို ရေးဗားပလိတ်အသင်းထံ အငှားပြန်ချထားခဲ့ပြီး ယခုမှ လာမည့်ရာသီသစ်အတွက် ခေါ်ယူလိုက်ခြင်းဖြစ်သည့်အတွက် နွေရာသီတွင် ခေါ်ယူထားသည့် ကစားသမားများနှင့်အတူ ၎င်းကိုလည်း တစ်ပါတည်း မိတ်ဆက်ပေးခဲ့ခြင်းဖြစ်သည်။

မန်စီးတီးအသင်းသည် အဆိုပါမိတ်ဆက်ပွဲကို တနင်္ဂနွေနေ့ ဒေသစံတော်ချိန် နေ့လယ် (၁း၅၀)နာရီတွင် စတင်ခဲ့ပြီး အီတီဟတ်ကွင်းအတွင်း ကစားသမားတစ်ဦးချင်းနှင့် မိတ်ဆက်ပေးခဲ့သလို၊ အင်တာဗျူးအစီအစဉ်များလည်း ပြုလုပ်ခဲ့သည်။

အဆိုပါအစီအစဉ်ကို ပရိသတ်များအား အခမဲ့ဝင်ရောက်ကြည့်ရှုခွင့်ပြုရုံသာမက ကစားသမားများ လက်မှတ်ရေးထိုးထားသည့် အကျႌများ၊ ဘောလုံးများကို မဲဖောက်ပေးခဲ့ကြောင်းလည်း သိရသည်။

မိတ်ဆက်ပွဲအခမ်းအနားကို လွဲချော်ခဲ့ရခြင်းနှင့်ပတ်သက်၍ ကယ်လ်ဗင်ဖီးလစ်က ”ဒီနေ့ ပွဲကို မတက်ရောက်နိုင်ခဲ့တဲ့အတွက် ကျွန်တော် တကယ်စိတ်မကောင်းဖြစ်မိပါတယ်။ ခင်ဗျားတို့အားလုံးနဲ့ ကျွန်တော် မကြာခင် ဆုံတွေ့မှာပါ။ ကျွန်တော့်ကို ကြိုဆိုကြတဲ့အတွက်လည်း ကျေးဇူးတင်ပါတယ်”ဟု Twitter မှတစ်ဆင့် ပရိသတ်များကို ပြောကြားခဲ့သည်။